Dirixíes al públicu más mozo y dientro del compromisu del Conceyu cola normalización llingüística
Dientro de la ufierta cultural de la ciudá, esta selmana el Conceyu d'Avilés entama dos actividaes empobinaes a tresmitir ente les xeneraciones nueves la querencia pola nuestra cultura y tradiciones, amás d'un conocimientu meyor del nuestru patrimoniu llingüísticu.
Asina, esti vienres 24, a les 17.30 hores, la Biblioteca de La Xungarosa/Barriu de La Luz va acoyer "Traxinando n'Avilés". Trátase de la primer parada d'esti taller d'indumentaria tradicional. Ye una actividá de baldre dirixida a neños y neñes de 5 a 10 años na que Susana Sela va ser la encargada de llevalos alantre.
¿Cómo se vistíen homes y muyeres enantes? Con cuentos, mariquites y pintures va respondese a esta pregunta y va facese un percorríu pela historia del nuestru traxe tradicional. Pa esti taller hai 20 places disponibles y ye necesario apuntase enantes nes biblioteques de cada centru nel horariu avezáu. Van realizase en total 3 sesiones:
- 24 de marzu, vienres: La Xungarosa/Barriu de La Luz.
- 28 d'abril, vienres: La Carriona.
- 19 de mayu, vienres: Los Canapés.
Per otru llau, esi mesmu día, a les 19.00 hores, na Factoría Cultural va poder vese una sesión nueva del ciclu "La Reciella de La Factoría". Nesti casu va representase "Nora", de Factoría Norte. Trátase d'una obra interpretada por Ana Morán, cola música de David Varela y los dibuxos y animación de Juan Hernaz sobre'l testu de Fátima Fernández. Les marionetes, la música, les imáxenes van dir metiéndonos na historia de Nora, una neña mui especial.
Esta actividá entámala la Estaya de la Llingua en collaboración cola asociación Reciella-Families pol Asturianu. La cita próxima va ser el 28 d'abril con "Montesín", de Kamante Teatru, que'adapta'l cuentu de María Xosefa Canellada. Trátase del primer llibru infantil de les lletres asturianes y qu'agora, tamién pela primer vez, va poder vese adaptáu pa la so representación con marionetes.
