El xueves 16 de marzu, pela mañana, Claudio Serrano va impartir dos clases a alumnos/es de la Escuela de Doblaxe d'Asturies, pertenecientes a les sos promociones cuarta y quinta del Cursu Integral.
Claudio Serrano ye locutor y ún de los actores de doblaxe más reconocíos n'España. Nun paró de trabayar dende que nel añu 1986 diera voz a Pedrito, el glóbulu blancu que capitaneaba les defenses del cuerpu humanu en Érase una vez... la vida.
Los sos personaxes más famosos son Brandon Walsh, de Sensación de vivir, Otto de Los Simpson, el doctor Derek Shepherd de Anatomía de Grey y, tamién, Batman na triloxía de Christopher Nolan. Claudio Serrano ye la voz davezu de grandes actores como Ben Affleck, Christian Bale o Patrick Dempsey, ente más otros.
Como locutor llegó a convertise nún de los profesionales de referencia nel sector, siendo la voz institucional d'anunciantes y marques de gran prestixu. Amás, nel mundu de los videoxuegos interpretó a dalgunos de los personaxes más populares.
N'actualidá combina la so actividá profesional nel doblaxe y la locución cola docencia, como profesor del Máster de Locución Audiovisual, Publicitaria y Documental de la Universidá Rei Juan Carlos.
Con Claudio Serrano principia una axenda formativa con intervenciones de profesores invitaos que, periódicamente, van dir ufriendo los sos conocimientos al alumnáu de la Escuela de Doblaxe d'Asturies. Ésta, xunto con Gonzali Producciones, vien afitando pasu ente pasu una creciente industria de doblaxe y locución na nuesa comunidá autónoma.
INFORMACIÓN COMPLEMENTARIA
