Trátase d'un proyectu pilotu que va permitir llevar el nuestru idioma a la reciella de 0 a 3 años dientro de les actividaes complementaries de les escueles. Pa ello, el Conceyu d'Avilés, al traviés de la Estaya de la Llingua, va programar sesiones de bebecuentos, que se van celebrar en delles escueles d'Educación Infantil de la ciudá y nes que va participar el conocíu actor Carlos Alba, Cellero.

La campaña tamién va tener un material específicu pa estos niveles. Consiste na distribución d'una caxa con un xuegu infantil onde neños y neñes van poder diferenciar animales de la casería como la pita, la oveya, la xata, el coneyu, el musín, el perru, el coríu, el gochu y el burru. El xuegu compónse tamién d'una alfombra onde ta'l contornu del animal col so nome y una pieza cola imaxe del mesmu. Asina, los neños y neñes van poder rellacionar conceutos al empar que deprenden el nuestru idioma.

Les sesiones, que van tener un llargor de 20 minutos, van celebrase nes escueles y horarios que vienen darréu:

• Día 21, 10.00 hores. Primera sesión de bebecuentos na Escuela Infantil d'El Quirinal.
• Día 21, 10.30 hores. Segunda sesión de bebecuentos na Escuela Infantil d'El Quirinal.
• Día 22, 10:00 hores. Sesión de bebecuentos na Escuela Infantil de La Toba.
• Día 22, 11:00 hores. Sesión de bebecuentos na Escuela Infantil de La
  Madalena.

Ye la primer vez que dende la Estaya de la Llingua se trabaya coles escueles infantiles, siendo tamién una de les primeres veces qu'a nivel d'Asturies un serviciu de normalización entama un proyectu pa llevar l'enseñu de la nuestra llingua a los escolinos y escolines de menor edá.

Asina, bien ceo van sumase más conceyos a esta iniciativa que surde de la Estaya de la Llingua en collaboración cola Conceyalía d'Educación. Un proyeutu que naz coincidiendo cola celebración del Día Internacional de la Llingua Materna, pero que pretende espardise acullá d'esta conmemoración. Too ello cola sida de que, dende bien neños, los avilesinos y avilesines deprendamos a falar y a querer el nuestru patrimoniu llingüísticu.

 

Día Internacional de la Llingua Materna n'Asturies

 

El Día Internacional de la Llingua Materna proclamólu la UNESCO nel 2000 y celébrase dende esa fecha cada 21 de febreru pa recordar la importancia de protexer y favorecer el multillingüismu. Esti añu, la conmemoración tien el lema d'Educación de calidá, llingües d'enseñanza y resultaos d'aprendizaxe. La intención ye dexar patente la importancia de tolos idiomes y n'especial de les llingües maternes pa consiguir una educación de calidá.

N'Asturies, el motivu central de la celebración ye la visibilización del asturianu y del gallego-asturianu como llingua materna y como una ayalga cultural propia, qu'afala la calidá de la educación a tolos niveles col usu, ameyorando les capacidaes de comprensión y creatividá, al empar que favorez l'arriquecimientu de les rellaciones sociales y de les estratexes comunicatives.