Ante'l discutiniu esistente pol cobru del IBI en distintos conceyos asturianos a horros, paneres y cabazos, el Grupu Municipal de Conceyu Abiertu por Noreña quixo asegurase de qu'en Noreña nun ta asocediendo tal despropósitu.

Dende l'agrupación d'electores nun s'entiende cómo pue ser posible que se cobre l'Impuestu de Bienes Inmuebles a estos elementos de l'arquitectura tradicional que son consideraos bienes muebles, amás de constituyir esti cobru una amenaza pal caltenimientu d'esti patrimoniu.

Frutu d'esta esmolición, Conceyu Abiertu por Noreña preguntó na Comisión d'Economía y Facienda si'l Conceyu yera conocedor de si en Noreña taba cobrándose l’IBI a horros y paneres. El nuesu Conceyu, como otros munchos, tien delegada la recaldación d'esti tipu d'impuestos nel Principáu polo que si se tuviera faciendo podríamos nun tar al tantu d'ello.

Ante'l desconocimientu esistente sobre'l cobru d’IBI a horros y paneres, el nuesu Grupu Municipal solicitó que se fixeren les xestiones necesaries pa confirmar que nun se ta cobrando y si, otra manera, descubriérase que sí se ta cobrando l’IBI a estos elementos en Noreña realicen les aiciones necesaries pa evitalo.

Como s'esplicó, ye posible dexar de faelo y esa ye la nuesa postura. Per un llau, pa los elementos de más de cien años d'antigüedá puede dase una exención d'oficiu dende yá, dao qu’esiste base llegal pa faelo. Per otru, pal restu d'elementos ye posible redactar una normativa pa eliminalo independientemente de la so antigüedá.

Finalmente, dende Conceyu faise un llamamientu a los vecinos y vecines de Noreña propietarios d'horros y paneres a que revisen los sos recibos y sí dalgún detecta que se-y cobra IBI por ello lo ponga en conocencia del Conceyu o d'esti grupu municipal.