El Centru Asturianu de Madrid anunció que'l gallardonáu col Premiu Urogallo de Bronce na modalidá de Llingua Asturiana, correspondiente a la convocatoria de 2016, ye l'escritor y promotor cultural Humberto Gonzali.

Esti gallardón del Centru Asturianu de Madrid reconoz la trayeutoria de persones que trabayen a favor del nuesu idioma vernáculu n'estayes estremaes y vien entregándose dende l'añu 1986.

Humberto Gonzali (Figareo, Mieres, 1961) ye'l presidente actual de l'Asociación Cultural L'Arribada. Destaca como poeta y narrador y ye autor de guiones cinematográficos. Foi miembru de l'asociación Conceyu Bable y profesor d'asturianu .

En 1985 ye nomáu secretariu de la Xunta pola Defensa de la Llingua Asturiana, onde coordinó numberoses aiciones de protesta pola denegación de derechos llingüísticos, destacando les promovíes ante la sanción al factor de FEVE de Nava por usar la toponimia tradicional. Xunto con Juan Bonifacio Lorenzo Benavente y Xicu Monteserín funda en 1988 Orbayando, revista asturiana d'información, que codirixe hasta l'añu 1990.

Nel 1990 crea con otros autores asturianos l'asociación Escritores y Traductores en Llingua Asturiana (ETLLA) de la que foi'l so presidente. Promovió la IV Xunta d'Escritores Asturianos celebrada en Villaviciosa en 1996,  y promovió y foi'l coordinador de la V Xunta d'Escritores Asturianos fecha en Lluanco en 1998. En 2006 creaL'Arribada, foru lliterariu y cultural qu'impulsa nel conceyu de Xixón, siendo dende 2008 el so coordinador d'actividaes na Vagamar, nes xornaes lliteraries del Festival Arcu Atlánticu y na Semana Negra, asina como nos actos entamaos nos conceyos de Bimenes, Caravia, Castrillón, Colunga, Corvera, Santiso d' Abres y Villaviciosa.

Ye representante nel Conseyu Asesor de la Llingua Asturiana del Ayuntamientu de Xixón dende febreru de 2009. Foi miembru de la Xunta Rectora de la Fundación Municipal de Cultura, Educación y Universidá Popular de Xixón mientres diez años (2005-2015) y miembru de númberu de representación nel RIDEA (2007-2012).

Como narrador publicó los llibros de rellatos 'Anatomíes de la mañana' (1995) y 'Histories escabroses' (2002); y como poeta, los poemarios 'Augua d'invocación' (1988), 'Poemes en prosa' (1992), 'Hábitat azul' (1995), 'Ámbitu elemental' (1997), 'Del país de la caliza' (1997), 'Les esferes del tiempu' (1998), 'De nueche y agua' (2000), 'Tiempu de nós' (2001) y 'Decenariu' (2005). Tradució del francés y del catalán a los escritores François Sautereau y Maria Barbal. Como traductor y axustador audiovisual versionó n'asturianu los diálogos de 18 doblaxes, ente ellos los de los llargumetraxes 'One-Eyed Jacks' , 'Dirty Harry' y 'Inception', que tien emitío delles vegaes la Televisión del Principáu d'Asturies. La so obra afáyase tamién en revistes literaries y en decenes de llibros coleutivos.