De la profesora de Antropoloxía Mónica Tarducci, col títulu "Muyeres, política y vida cotidiana: una visión dende América Llatina".
El Máster n'Estudios de les Muyeres y de Xéneru (GEMMA), unu de los trés qu'imparte la Universidá d'Uviéu col sellu Erasmus Mundus, tien programada pal próximu vienres, 30 de setiembre la so conferencia inaugural. Va impartila la profesora d'Antropoloxía de la Universidá de Buenos Aires, Mónica Tarducci, y lleva por títulu "Muyeres, política y vida cotidiana: una visión dende América Llatina". La charra va tener llugar na Aula Magna del Edificiu Históricu de la Universidá, a les 18:30 hores.
El Máster Ofical Erasmus Mundus GEMMA ye un programa interdisciplinar, que busca'l desenvolvimientu de competencies pa la intervención en materia d'igualdá y la formación en metodoloxíes d'estudios de les muyeres y de xéneru nel ámbitu européu. Los sos estudios pueden cursase escoyendo ente siete universidaes d'un consorciu, pertenecientes a seis países europeos: Uviéu y Granada, n'España; Bolonia, n'Italia; Universidá Central Europea (CEU), n'Hungría; Universidá de Hull, en Reinu Uníu; Universidá de Lodz, en Polonia; y Universidá de Utrecht, nos Países Baxos. A partir de 2012 va incorporase la Universidá de Rutgers (EEXX).
Los Másteres Erasmus Mundus son cursos integraos d'alta calidá impartíos por un consorciu de siquier tres universidaes de tres países europeos distintos. Pa ser escoyíos, los másteres tienen de ser «integraos», esto ye, tienen de prever un periodu d'estudiu en siquier dos de les trés universidaes, que van rematar col llogru d'un diploma conxuntu, doble o múltiple reconocíu. El programa Erasmus Mundus ye una de les apuestes del Campus d'Excelencia Internacional de la Universidá d'Uviéu.
Xuntu al d'Estudios de les Muyeres y de Xéneru, la Universidá d'Uviéu imparte otros dos másteres con esa categoría: el de Biodiversidad Marina y Caltenimientu y el de Mecatrónica y Sistemes Micromecatrónicos. A partir de 2012, van impartise otros dos programes Erasmus Mundus que van tener a la Universidá d'Uviéu como entidá coordinadora internacional: unu d'Enfermería d'Urxencies y Cuidos Críticos y otru sobre Tresporte Sostenible y Sistemes Eléctricos de Potencia.
