La banda orixinaria d’Avilés prepara un añu 2017 enllenu d’actividaes pa festexar el so aniversariu

Avilés.-Un 6 de xineru de 1987, nunes cocheres de Castañeda (Corvera), axuntábense cuatro rapazos col enfotu d’entamar un grupu de rock que cantare n’asturianu; aquello foi l’orixe d’una de les bandes más importantes del panorama musical del país: DIXEBRA. De manera

ininterrumpida a lo llargo d’estos trenta años foron iguando un estilu propiu, reconocible y orixinal que se sofita en tres premises básiques: emplegu esclusivu de la llingua asturiana, lletres comprometíes y descriptives de la realidá asturiana, y utilización de la gaita y elementos de la tradición sonora asturiana. Musicalmente tienen evolucionao dende un soníu rudu y básicu, onde’l punk yera l’estilu predominante, a otru muncho más mestizu, variáu y con infinidá de matices, nel qu’entren toa clas d’influyencies: ska, reggae, funk, rap, metal, folk…

Delles de les sos composiciones tiénense convertío en verdaderos himnos y reflexen como naide la realidá social, llaboral, política o cultural d’esta tierra, como ye’l casu de «Rapaza nacionaliega», «Nun llores», «Mañana fría», «La danza», «Canciu d’amor», «Tía Nemesia», «Indios», «Don Vito» y munches otres. Tanto ye asina que pue siguise la historia recién d’Asturies al traviés de les sos lletres, onde faen referencia a munchos de los acontecimientos y socedíos que se desarrollaron nes últimes tres décades. Amás, el so compromisu y solidaridá llevólos a tocar desinteresadamente por causes y colectivos como la insumisión, contra el paru y la probeza, los despedíos de Duro Felguera, el sector naval, la oficialidá del asturianu, la minería, contra la guerra n’Irak o n’apoyu de represaliaos

por movilizaciones socio-llaborales.

Curtíos en milenta conciertos, fixéronse con un merecíu prestixu como poseedores d’ún de los meyores directos que se pueden ver n’Asturies. Nesti tiempu percorrieron prácticamente tola xeografía asturiana, amás de bien de salíes fuera d’ella (con incidencia

bultable en llugares como Euskal Herria, Galicia o Cantabria), llegando a tocar tamién per Europa (Bretaña, Occitania, Valonia, Laponia, etc). Merez destacar que foron el primer grupu de rock asturianu en participar nel afamáu Festival Intercélticu de Lorient o nel Liet

International. Otra manera, el so llabor discográficu llevólos a la publicación d’una docena d’álbunes, ente los que destaca’l tituláu Dixebra n’acción, grabáu en directo na Plaza El Parche d’Avilés, delantre de más de 3.000 siguidores.

Aquellos cuatro rapazos de la primer formación, convirtiéronse col tiempu nuna banda amplia de nueve músicos que siguen col mesmu puxu y ilusión del primer día, ufiertando actuaciones ensin fuelgu, dinámiques y conectando col públicu como pocos. Pa festexar esti XXX Aniversariu van entamar una serie d’actividaes y iniciatives que van espardise a lo llargo de tol añu 2017, ente elles una estensa xira col nome TOUR 87-17, que los va llevar a tocar per munchos llugares d’Asturies y del Estáu y tamién per dellos d’Europa. Nesti sen,

el conciertu d’inauguración de la mesma va desenvolvese’l sábadu 18 de febreru nel local de l’Asociación Músico-Cultural Pepe Bocanegra, nel pueblu de Valles (Piloña), onde van presentar el repertoriu d’esta temporada, nel que recuperen temes qu’hai cuantayá que

nun toquen y renueven samplers y arreglos. Les feches y llugares definitivos de la xira van dase a conocer una vez tea zarrada completa y definitivamente, anque pue adelantase que tamién tán preparando dalgún conciertu especial.

Al empar d’ello, tienen en marcha un proyectu denomináu Dalgo vieyo, dalgo nuevo, dalgo emprestao, que consiste na grabación d’una de les sos primeres canciones, «Da-yos caña», acordies a la formación actual y con arreglos nuevos (Dalgo vieyo); d’un tema nuevu, «Sigue’l

tren», con una lletra onde falen de la so trayectoria, con personaxes que xuben y baxen a esi tren metafóricu (Dalgo nuevo), y d’una versión del cantar tradicional irlandés «New York girls», basáu na de la banda británica Oyster Band (Dalgo emprestao). D’estos tres

temes van facese otros tantos videos por parte del realizador xixonés Javier Lueje (autor del so primer video-clip nel añu 1997), que van dir dando a conocer nos próximos meses.