La Federación d'Asociaciones Xuntanza, col sofitu del Conceyu d'Avilés, entama esti festival dende l'añu 2009

• Dende’l 5 d’ochobre, los escolinos y tola xente del conceyu van poder asistir a la esposición “Mitos asturianos”, del dibuxante llangreanu Javier Iván Villa Vilchez

• Un conciertu d’Anabel Santiago y una Nueche en Danza con Tuenda van ser dos de les principales actividaes musicales del festival

Esti martes 4 d’ochobre, la conceyala de Promoción Social y Cultural, Yolanda Alonso, y la responsable de la Estaya de la Llingua, Monsterrat Machicado, participaron na presentación de la Seronda n’Avilés, que llega esti añu a la so XIV edición. Con actividaes el vienres 28 y el sábadu 29 d’ochobre, amás de tradiciones y gastronomía, el festival va traer a la ciudá muncha música. Too esto gracies a les actuaciones, ente otros, d’Anabel Santiago y Tuenda, que van poner el ramu musical a la Nueche en Danza; una xuntanza de xente pa baillar colos sones tradicionales d’Asturies. Les actividaes van celebrase, como ye vezu, na Plaza de Domingo Álvarez Acebal. Con too, dende’l día 5 d’ochobre va poder vese na Casa la Cultura la esposición “Mitos asturianos”, del dibuxante llangreanu Javier Iván Villa Vilchez.

Pela mesma van pasar, amás del públicu en xeneral, los escolinos y les escolines del Conceyu, que van poder conocer asina los personaxes mitolóxicos asturianos más populares, dende’l trasgu al busgosu o la xana, ente otros munchos. La muestra va tar acompañada por dellos testos onde s’espliquen les carauterístiques d’estos personaxes. Los dibuxos tamién inclúin unos testos nos que se fai una curtia descripción de caún de los personaxes y un xuegu con entrugues pa que la xente pueda averase a esta temática d’un mou cenciellu y afayadizu.

La esposición yá pasó, con ésitu, per dellos Conceyos que pertenecen a la Rede de Normalización Llingüística y ye una de les novedaes que va tener esti añu la Seronda. Y ye qu’esta edición va poner especial enfotu nes xeneraciones nueves. Asina, el festival va llegar a les escueles del Conceyu, onde amás de poder ver el documental “Mitología de Asturias”, los escolinos y les escolines van participar nun concursu de carteles sobre la Seronda.

Nel apartáu musical, amás de los y les artistes que se nomaron enantes, avilesinos, avilesines y visitantes van disfrutar colos sones de la pandereta gallega del grupu Afoutos, el baille de Xaréu d’Ochobre, el soníu tradicional de la Banda de Gaites Picos d’Europa y la música folixera de los grupos Caldo y Os Rabizos y El Koku la Manzana. Otra manera, ente otres munches actividaes, RPA va emitir en directo dende la carpa n’Alvárez Acebal el programa “Asturias x 2”.

La Federación d'Asociaciones Xuntanza, col sofitu del Conceyu d'Avilés, entama esti festival dende l'añu 2009, siguiendo'l llabor qu'años anteriores facía cola l'Asociación d'Investigación Etnográfica y Folclórica Escontra'l Raigañu. Les actividaes pretenden enseñar les costumes y llabores específiques de la seronda n'Asturies; una época de trabayu n'andecha, de collaboración y de tresmisión xeneracional de la nuestra llingua y cultura. Too esto acompañao de música, cuentos, danza y productos bonos, ente los que tampoco nun van faltar el pote de berces, l'arroz con lleche, les castañes y la sidra dulce.

Programa completu XIV Seronda n’Avilés

El 28 y el 29 d’ochobre de 2016

Plaza de Domingo Álvarez Acebal

Entamen: Federación Xuntanza y Conceyu d’Avilés

Vienres 28 d’ochobre

-       18:00 hores. Apertura de la carpa na plaza de Domingo Álvarez Acebal, con vezos y costumes del amagüestu y ellaboración de sidra dulce, amás d’un chigre con productos de la seronda.

-       19:30 hores. Banda de Gaites Picos de Europa-D.O.P.Quesu Cabrales.

-       20:00 hores. Inauguración oficial XIV Seronda n’Avilés.

-       20:30 hores. Tiempu d’esfoyaza: Escontra’l Raigañu.

      Animación: Olga Cuervo y Borja Roces.

-       22:00 hores. Conciertu de pandeireta gallega: Afoutos.

-       23:00 hores. Comienza la Nueche en Danza.

Música popular y grupos de pandereta.

“Si quies participar val con tener ganes de baillar”.

Actuación: Tuenda.

-       24:00 hores.  Pieslle de la carpa

Sábadu 29 d’ochobre

-       10:00 hores.  Progama de RPA en direutu dende la carpa d’Álvarez Acebal: “Asturias x 2”.

-       12:00 hores. Apertura del chigre con comida y bebida: sidra del duernu y castañes amagostaes.

-       13:00 hores. Sesión vermú.

Conciertu d’Afoutos.

-       14:30 hores. Comida popular: pote de berces y arroz con lleche.

-       16:30 hores. Pieslle de la carpa.

-       18.30 hores. Apertura de la carpa.

-       19:30 hores. Bailles y dances.

Xareu d´Ochobre.

-       20:00 hores. Conciertu Anabel Santiago y David Varela.

-       21.00 hores. Verbena popular.

Caldo y Os Rabizos y El Koku la Manzana.

-       24:00 hores. Pieslle de la carpa.