La conceyala de Cultura, Yolanda Alonso, la direutora d´Asistencia Sanitaria del área sanitaria III, Lidia Clara Rodríguez y la responsable de la Estaya de la Llingua, Montserrat Machicado, participaron na presentación en rueda de prensa d´El llibru pa lo más piquiñino de casa. Ye una campaña na que collaboren el Conceyu d´Avilés y l´Hospital Universitariu San Agustín, que se fai al mesmu tiempu n´Avilés, Carreño, L.lena, Siero y Xixón.
La campaña pretende afayar un preséu prestosu, cenciellu y enforma manexable onde se pueda dir escribiendo y llantando información bien importante del neñu o neña qu´acaba de ñacer, retratos de recuerdu, persones que lu o la arrodien y cuiden, pesu, lo que va medrando, etc. Tamién hai una riestra apartaos con pallabres prestoses o nomes pa neños y neñes.
El material pa repartir ye un llibru onde escribir, pegar o dibuxar tola información referente al neñu o neña de rollu, entituláu El llibru pa lo más piquiñino de casa. Los testos tán fechos pola Rede de Servicios de Normalización del Principáu d´Asturies, les ilustraciones son d´Olmo García Huete y ta editáu pola Editorial Trabe.
La distribución de 450 exemplares va facese a traviés del Hospital San Agustín pa neños y neñes que nazan nel centru. Poro, l´espardimientu va ser bien grande y hai de destacar la mui importante collaboración del centru hospitalariu nesta campaña de normalización de la llingua asturiana.
