- Cultura incluye esta oferta na programación cultural del branu pola bona acoyida que tuvieron otres visites entames a lo llargo l’añu
Avilés.-La Estaya de la Llingua del Ayuntamientu d’Avilés organiza 3 visites guiaes n’asturianu a sitios emblemáticos del Conceyu. Col títulu de “CaleyAvilés”, van visitase los espacios que vienen darréu: playa de San Xuan, dunes de L’Espartal y charca de Zeluán, parque de Ferrera y cascu histórico de la ciudá.
La conceyala de Cultura esplicó que meter estos percorríos na programación cultural pa esti branu débese al interés y gran acoyida por parte del públicu a les visites n’asturianu organizaes nos últimos años dende la Estaya de la Llingua d’Avilés, el principal preséu d’espardimientu de la llingua y la cultura asturianes del Conceyu.
Esti ye’l programa de les visites:
- Vienres, día 29 de xunetu. De 16:30 a 21:00 hores. Visita guiada pela playa de San Xuan, dunes de L’Espartal y charca de Zeluán. Les persones participantes van pescanciar d’una manera cenciella la dinámica costera y los diferentes ambientes costeros de la zona: estuarios, marismes, playa y dunes.
Salida en bus a les 16:30 dende Avilés hasta la playa de San Xuan onde nos ta esperando la guía pa entamar la visita a les 17:00 hores. La duración ye de tres hores y media. En terminando la visita a les 20:30, recoyida de visitantes na playa de San Xuan y vuelta en bus p’Avilés.
Puntu d’alcuentru: El Carbayedo (delantre de Casa Tataguyo)
- Llunes, día 29 de agostu. De 17:30 a 19:30 hores. Visita guiada pel parque Ferrera. Podemos ver los árboles más emblemáticos de la nuestra cultura: carbayos, texos, castañales, etc. Vamos descubrir la importancia que tuvieron y que tienen na historia d’Asturies, creencies y cultura asturiana alrodiu d’ellos.
Puntu d’alcuentru: Edificiu La Noria (dientro’l mesmu parque)
- Xueves, día 29 de setiembre. De 17:30 a 19:30 hores. Visita guiada pel cascu históricu de la ciudá. La historia d’una ciudá milenaria, al traviés de los sos monumentos.
Puntu d’alcuentru: Casa Conceyu (El Parche)
Recomendaciones y qué facer p’apuntase
Recomiéndase en toes elles calzáu y ropa cómodo. Les places pa caúna de les visites ye de 20 persones. Les actividaes son de baldre.
P’apuntase: per teléfonu, llamando al númberu de la Estaya 985 54 55 08; per corréu electrónicu na direición que vien darréu: estayallingua@ayto-aviles.es o presencial na Casa la Cultura d’Avilés (plaza Domingo Álvarez Acebal, 2, primer pisu).
