Picatueru, el personaxe d'animación conocíu n'español como Pájaro Loco, falará n'asturianu nel doblaxe que Gonzali Producciones ta faciendo del curtiumetraxe Pantry Panic

. Rodáu en tecnicolor y con una duración de cuasi siete minutos, esta película va usase xunto con otres como material de trabayu nun taller de doblaxe infantil , entamáu pola productora y la Fundación Municipal de Cultura xixonesa, y que se desarrollará dientro del Festival Arcu Atlánticu los díes 26, 27 y 29 de xunetu.

Esti taller, que quier averar a neños ente los 6 y los 12 años al doblaxe en llingua asturiana, contará con sesiones diaries de 90 minutos, n'horariu de 12 a 13:30 hores. Tará allugáu na Carpa Espaciu Pallabres, nel Puertu Deportivu (El Muelle).

Les inscripciones, que son de baldre, fadránse con tarxeta ciudadano del 12 al 22 de xunetu nes Oficines d'Atención al Ciudadanu o en caxeros ciudadanos y en www.actividades.gijon.es

.