El diputáu acudió a Martimporra con Lluismi Orviz, qu’agradeció «el reconocimientu de derechos llingüísticos» del conceyu yerbatu

Respaldu a la Corporación del Ayuntamientu de Bimenes que, por unanimidá, anovó nel plenu estraordinariu celebráu esti mediudía en Martimporra’l so compromisu cola oficialidá del asturianu. Enrique López, diputáu nel Parlamentu asturianu, y Lluis Miguel Orviz, responsable de la estaya de Llingua Asturiana nel Conseyu Ciudadanu autonómicu, participaron güei na XX Fiesta pola Oficialidá de Bimenes en representación de Podemos Asturies. El parlamentariu afirmó nes declaraciones que fizo unos minutos enantes d’acudir al plenu que dende’l partíu moráu «vamos siguir trabayando pa que l’usu y el respetu a la llngua asturiana seyan dafechu normales y cada vez más asumíos pola sociedá, evitando los sectarismos».

El diputáu na Xunta Xeneral recordó que «tamos güei equí festeyando cola xente, colos representantes del pueblu de Bimenes nel Ayuntamientu y con representantes d’otros conceyos asturianos el diecinueve aniversariu de la primer declaración d’oficialidá d’un conceyu asturianu». Añadió que «diecinueve años dempués los avances del asturianu fueron pocos, pero siguen dándonos un exemplu claru conceyos como Bimenes, onde la normalización de la llingua non solo nun ye una torga pa nada sinon qu’amás supón un elementu de riqueza cultural y social. El respetu a la llingua ye un valor na identidá propia del pueblu asturianu».

Pola so parte, Lluis Miguel Orviz apuntó que’l conceyu de Bimenes ye un exemplu de que «cuando se faen bien les coses en temes de normalización llinguïstica nun tien por qué crease nenguna polémica. El reconocimientu de derechos llingüsticos por parte d’esta Casa de Conceyu ye un tema de consensu pa la xente yerbato. Toles corporaciones dende va venti años hasta agora, con independencia de les sos ideoloxíes y de les sos polítiques, respaldaron non solo esta fiesta, sinon la política de normalización que, de forma natural y con tranquilidá, vienen desarrollando tolos alcaldes al marxe de la fuerza política a la que pertenecieran». Acabó espresando’l so apoyu, agradecimientu y felicitación «a tolos vecinos y vecines de Bimenes por esti reconocimientu de derechos llingüísticos».

Al plenu institucional tamién asistieron en representación de les candidatures d’unidá popular la conceyala Nuria González (Somos Villaviciosa) y los conceyales Orlando Fernández (Xixón Sí Puede), Fernando Villacampa (Somos Uviéu) y Javier Pintado (Somos Siero).