Efectivos de l'Axencia Tributaria personáronse esta mañana nes oficines de Google na Torre Picasso de Madrid, asina como nel Campus que tien la compañía nel centru de la capital.

Tres la llegada de los axentes de l'Axencia Tributaria, prohibióse l'accesu dende l'esterior a la sede, asina como que cualquier persona salga de les instalaciones, según testigos presenciales.

Pela so parte, la compañía señaló nun comunicáu enviáu a Europa Press que ta cooperando coles autoridaes españoles pa "responder a toles sos entrugues", como fai "siempre" la empresa. Coles mesmes, Google tamién afirmó que cumple cola llexislación fiscal n'España, igual que fai en tolos países nos qu'opera'l grupu.

NUN HAI PREVISTA NENGUNA ACTUACIÓN MÁS

El xuez de lo Contencioso-Alministrativo númberu 29 de Madrid ye'l qu'autorizó esti xueves la entrada y rexistru de les oficines del Grupu Internacional Google tres un pidimientu de l'Axencia Tributaria el pasáu 27 de xunu, informaron fontes xurídiques.

Les mesmes fontes señalen que l'actuación del xulgáu nesti asuntu lléndase nel actu de rexistru y nun tien previsto realizar nengún tipu d'actuación más al tratase d'una investigación que lleva a cabu la mesma Axencia Tributaria.

El pasáu mes de mayu les autoridaes franceses rexistraron una de les sedes del xigante, ubicada nel centru de París, nel marcu tamién d'una investigación por presunta evasión fiscal. L'alministración gala reclamó un total de 1.600 millones d'euros n'impuestos al xigante tecnolóxicu norteamericanu, al que critica pol usu de técniques d'inxeniería fiscal agresives.