Ente los finaos figuren diez estranxeros y trés persones con doble nacionalidá. Un responsable gubernamental turcu citáu por Reuters contó que nel ataque morrieron un ciudadanu chinu, un xordanu, un tunecín, un uzbeko, un ucranianu, un iranín, cinco saudinos y dos iraquinos.

De los mancaos, polo menos 109 yá recibieron l'alta. Según les primeres investigaciones, los trés terroristes suicides llegaron al aeropuertu en taxi y abrieron fueu nel interior de la terminal internacional antes de facer españar la carga esplosiva que llevaben.

Les autoridaes turques trabayen cola hipótesis de que l'atentáu foi responsabilidá d'Estáu Islámicu, anque, de momentu, nun hubo reivindicación per parte del grupu terrorista que lidera Abú Bakr al Baghdadi.

El presidente turcu, Recep Tayyip Erdogan, condenó l'atentáu y aseguró que'l so país va siguir combatiendo'l terrorismu "cueste lo que cueste" hasta consiguir el so "final". Amás, fizo un llamáu a tolos países pa lluchar xuntos contra los terroristes.

NENGÚN GRUPU LO REIVINDICÓ

Nengún grupu reivindicó de momentu l'autoría de los ataques, pero les autoridaes turques sospechen que l'autodenomináu Estáu Islámicu podría tar detrás d'ellos.

Sahin confirmó que fueron trés los suicides que llevaron a cabu los ataques n'Ataturk, el mayor aeródromu de la ciudá turca.

El ministru de Xusticia, Bekir Bozdag, esplicó que polo menos unu d'ellos abrió fueu con un fusil Kalashnikov antes d'españar los esplosivos, según 'Hurriyet'. Un testigu indicó a la cadena CNN Türk qu'escuchara disparos dende l'aparcamientu del aeropuertu.

Numberoses ambulancies tuvieron qu'esplegase na zona, ya inclusive dellos taxis tuvieron tresportando firíos a los hospitales. Mientres, el primer ministru turcu ordenó un gabinete de crisis sobre l'incidente.

VUELOS

L'accesu al aeropuertu Ataturk quedó bloquiáu y tamién s'anunciaron esvíos y cancelaciones nos vuelos, magar les aerollinies nun determinaron tovía l'algame d'estes suspensiones nin hasta cuándo podríen estendese.

Un voceru de Turkish Airlines esclaró que los aviones van poder siguir aterrizando hasta les 00.10 (una hora menos na España peninsular), mientres que yá s'atayaron tolos despegues previstos pa esta nueche, informa l'axencia de noticies Reuters.

FOLA D'ATENTAOS

El segundu aeropuertu d'Istambul, el de Sabiha Gokcen, yá sufrió ataques n'avientu del 2015, nun atentáu nel que perdió la vida una muyer del personal de caltenimientu y que reivindicó'l pol grupu armáu Ferres de la Llibertá del Kurdistán (TAK).

Estambul tamién foi escenariu esti añu de dellos atentaos, ente ellos dos cometíos por terroristes suicides en delles zones turístiques y de los que les autoridaes culparon al grupu yihadista Estáu Islámicu. N'Ankara tuvieron lugar dos ataques con coche bomba reivindicaos por milicianos curdos.