El músicu, cantante y 'showman' asturianu Rodrigo Cuevas convidó a "tola flora y la fauna" a tomar parte na grabación del videoclip del so éxitu 'Ritmu de Verdiciu' (la so versión de la tradicional 'Soi de Verdiciu'), que va tener llugar esti miércoles, de magar les 16.00 en Verdiciu (Gozón).
Asina lo informó la productora El Cohete Internacional nuna nota de prensa. Nel so perfil de Facebook, l'artista llama a la ciudadanía a acudir "lo más folklórico vistío que se puea (y tuniáu) y dispuestos a baillar y pasalo mui bien".
Esclara que "nun fai falta confirmar, namás apaecer". "Hai cabida pa tou tipu d'edaes! Trai a la to güela, al to sobrín, a la to xefa o a a los amigos... Compartan, publiquen y enllenemos Verdiciu de baille y ritmu....", señala'l cantante.
DOCUMENTAL
Per otra parte, la productora tamién informó de que ta en marcha'l rodaxe del documental 'El viaje de Rodrigo Cuevas', pal que s'activó una campaña de micromecenazgu en Verkami.
"Trátase d'un proyectu de documental que mientres esti branu va siguir les andances personales y profesionales de Rodrigo Cuevas per gran parte de la península: Asturies, Galicia, Madrid, Cádiz, y "que pretende dibuxar una semeya poliédrica, pero lo más fidedigna posible, d'esti artista singular y intransferible", espliquen dende El Cohete.
