Asina lo señaló'l voceru del Comité Electoral de los socialistes, Antonio Hernando, nuna rueda de prensa en Ferraz, mientres siguía reunida la Comisión Executiva Federal del partíu, convocada esti llunes p'analizar los resultaos d'esti domingu. A puerta zarrada, el líder de los socialistes defendió que'l PSOE nun pue facilitar un gobiernu del PP, nin por activa nin por pasiva, porque son l'alternativa.

Dempués, na sala de prensa, Hernando insistió en que la pelota ta agora nel teyáu del PP y defendió que ye'l presidente del Gobiernu en funciones, Mariano Rajoy, el que tien de dar los primeros pasos, al ganar les elecciones, eso sí, sin contar colos socialistes.

El voceru reconoció que los socialistes nun tán satisfechos col veredictu de les urnes, porque nun llograron imponese al PP, pero tamién destacó, como ayeri yá fizo'l secretariu xeneral que consiguieron caltenese como primer fuerza de la izquierda, a pesar de los pronósticos y les dificultaes.

"DEBILITÁRONSE LES FUERCES DEL CAMBIU"

A partir d'equí, insistió en que ye'l PP, como partíu ganador, el que tien qu'intentar formar gobiernu. Los resultaos d'ayeri, remachó, muestren que l'alianza "ente'l PSOE y Podemos" nun suma y, ello ye que "da muncho menos que la vez anterior". "Debilitáronse les fuerces del cambiu y eso alloña'l cambiu evidentemente", dixo.

Y señaló directamente a Unidos Podemos como responsable d'esta situación, porque'l partíu moráu "tuvo oportunidá" d'apoyar a un presidente socialista y sicasí "decidió da-y una segunda oportunidá" a Rajoy.

Por eso, apuntó que'l líder del PP "tien que tar bien agradecíu" a los sos siete millones de votantes, pero tamién-y debería dar les gracies a Pablo Iglesias", por facer que "el cambiu s'alloñe d'España". "Coles sos decisiones, Iglesias fizo posible la situación na que güei mos alcontramos", dixo.

"LA PRESIÓN", NA CAI GÉNOVA

Coles mesmes, el voceru socialista recalcó en qu'agora "la presión" ta en Génova y ye'l PP el que tien qu'empezar a "dar respuestes" y "echar cuentes". Y en elles, insistió, nun puede contar col PSOE. Eso sí, evitó plantegar escenarios más allá d'esti puntu y nun respondió si los socialistes van intentar atropar l'apoyu si Rajoy fracasa nel so intentu.

"D'equí p'alantre, ye a Rajoy a quien-y correspuende la iniciativa y tendría qu'empezar a descartar delles claves o hipótesis qu'ayeri nun fizo", remachó, pa dempués sorrayar que lo primero ye esclarar "si va presentase a la investidura".

Y dempués, dixo, tendrá qu'esplicar "con quién va falar y pa qué va falar", y buscar apoyos "ente los sos averaos ideolóxicos, ente los que rescampla que nun ta'l PSOE". Asina, Hernando volvió negar toa posibilidá de 'gran coalición'.