El presidente de Ciudadanos, Albert Rivera, insistió esti llunes en que'l so partíu quier abrir una mesa de negociación col PP y el PSOE pa formar gobiernu tres les elecciones xenerales del domingu, y al respective de Mariano Rajoy indicó que nun precisa a Ciudadanos pa gobernar yá que-y bastaba cola astención de los socialistes.
"P'apoyar a Rajoy yá ta'l PSOE, nun fai falta Ciudadanos", dixo en rueda de prensa na sede del partíu en participando na xunta del Comité Executivu.
N'argumentando que l'astención de los 85 diputaos socialistes sería abondo pa investir a Rajoy como xefe del Executivu, señaló que C's nun va ser nunca'l responsable de qu'hubiera que convocar unes terceres elecciones.
"Si quieren contar cola nuesa participación, va tener qu'haber cambiu de gobiernu", sorrayó al responder a les preguntes de los periodistes sobre si la formación naranxa taría dispuesta a astenese pa permitir un gobiernu de Rajoy.
Rivera incidió en que "si too va siguir igual, si va ser el mesmu gobiernu, el mesmu presidente y la mesma sospecha de corrupción", el so partíu va tar "na oposición". "Si me pregunta si vamos facer presidente a Rajoy colos 3,1 millones de votos de C's, la respuesta ye 'non'", precisó.
"Si daquién quier contar colos votos de Ciudadanos, non colos del PP, tien que saber que queremos cambiu, una nueva etapa, reformes y que la xente vuelva confiar nel Gobiernu", añadió. Na so opinión, Rajoy tien "tol derechu del mundu a buscar apoyos n'otros partíos", pero C's tien el mesmu derechu a "poner les condiciones de los sos votantes".
