En declaraciones a Europa Press, refirióse al casu de los futbolistes David de Gea, Iker Muniain y Fernando Amorebieta, presuntamente rellacionaos col llamáu 'casu Torbe', qu'investiga una supuesta de rede de tráficu y esplotación sexual de muyeres.

Precisamente 'La vida de siempre' toca esti fenómenu, que l'autor considera una "lacra tarrecible" qu'afecta a toa Europa, y hacia la qu'hai gran "pasividá social". El protagonista, un abogáu que lleva una tranquila vida llaboral y dedica los sos ratos llibres a solucionar papeleos a los inmigrantes indocumentaos, recibe la visita de Gladys, una d'eses moces supuestamente estorsionada por una rede de trata de muyeres.

Magar la pasividá social y policial hacia esti fenómenu, decide comprometese p'ayudar, poniendo en serio peligro la so vida y la de los sos familiares. A lo último, nada resulta ser lo que paez.

García Oliva espresa la so preocupación ante estes mafies de tráficu de muyeres, y magar defende "la presunción d'inocencia" de los futbolistes supuestamente rellacionaos con elles, considera que "hai que tener cuidáu de nun empericotialos". Na so opinión, "hai demasiada "indiferencia social", y "condescendencia" cuando se trata tratar de persones famoses.

"Paez que se respeta más a la xente cuando ye famosa", critica, refiriéndose tamién al casu de fraude qu'afecta a Leo Messi, o a la infanta Cristina, xulgada pol Casu Nóos.

INSPIRACIÓN NEL TELEDIARIU

Les noticies de socesos de los telediarios fueron la principal fonte d'inspiración del autor pa construyir esta novela. "Tolos díes dannos información sobre esti tema", señala. "Siempre ye igual: cacen a muyeres d'otros países y convénceles pa dir trabayar al estranxeru. Yo recuéyolo, novélolo y doi-y una solución individual", añade.

Sicasí, matiza que la so intención yera más construyir una hestoria personal qu'un documentu sobre les redes internacionales de prostitución. "Quería contar la historia personal d'un home que tien una vida traquila y que por tomar una decisión ética acaba metiéndose nun enguedeyu terrible del que ye bien difícil salir", comenta García Oliva.

Asitia la historia dientro del espectru de la novela negra, "más pol ambiente que polos crimes, magar acaba derivando nuna cuestión más personal, de daquién que quier saber por qué lu engañaron y por qué fixo'l payasu".

'La vida de siempre' llega precisamente nuna época de 'boom' de la novela negra a nivel internacional, que sicasí contrasta cola menor producción nel casu de la llingua asturiana. L'autor recuerda que la esplosión del xéneru na 'llingua' propia foi nos años 90. "Surdimos un grupu d'ocho o diez escritores", recuerda, ente los que menta a Xandru Fernández, a Dolfu Camilo, a Nel Amaro. "Garrónos una época de cambios importantes, col esmantelamientu d'Asturies, el zarru de los astelleros y les mines, los problemes na siderurxa".

"Y too coincidió con un cambiu xeneracional porque empezó a escribir xente más mozo, desencantao cola transición, y con una policía y unos xueces que siguíen siendo bastante corruptos", señala. Na so opinión, "eso empréstase muncho pa la novela negra". En tou casu, recuerda que sigue habiendo producción. Exemplifica con 'Sangre na braña', de Roberto González Quevedo, publicada nel 2012.