Nuna declaración institucional en Downing Street, Cameron consideró que, tres la derrota sufrida nun plebiscitu que supunxera una apuesta personal, "el país precisa un nuevu lideralgu". "Nun ye una decisión que nun tomara en serio", declaró, pero tres la "bien clara decisión" del electoráu, nun se considera "el capitán pa pilotar esti barcu al so próximu destín", en dirección de salida del bloque comunitariu.

Amás, el primer ministru esclaró que nun s'encargará d'aplicar l'artículu 50 del Tratáu de Lisboa, el que rixe sobre la salida d'un Estáu miembru, un llabor que-y solicitaren yá los partidarios del Brexit y que va depositase en manes de quien-y tome'l relevu tres seis años al frente del Gobiernu, los primeros cinco en coalición. "Lo correcto ye qu'esti nuevu primer ministru decida cuándo aplicar l'artículu 50", señaló.

Anque nun vio "necesidá d'establecer un calendariu", el mandatariu británicu calculó que'l so socesor tendría que salir escoyíu a tiempu pal congresu que los conservadores celebren el próximu mes d'ochobre. "Voi siguir nos próximos trés meses", especificó Cameron, qu'avanzó tamién que'l Gobiernu reuniráse'l llunes pa evaluar la situación.

Al respective, informó tamién que treslladara yá los sos planes a la reina Isabel II y que la próxima selmana va asistir al Conseyu Européu pa "esplicar la decisión de los británicos" nel referendu del xueves. "Y la mía propia", añadió.

GARANTÍES D'ESTABILIDÁ

Mientres siga nel cargu, garantizó que'l Gobiernu "va siguir adoptando la importante llexislación que tien ente manes" y prometió "asegurar que la economía británica sigue fuerte". Bastante ye que, magar la derrota, punxo en valor la contribución que pa esta nueva yera pue apurrir el bandu qu'apoyara la permanencia. "Los que perdimos tenemos qu'ayudar a que funcione", dixo.

"Somos un país especial, una gran nación y anque nun somos perfectos, podemos ser un modelu pa una sociedá multirracial y relixosa", reivindicó nun discursu nel que se mostró convencíu de que la posibilidá de "alcontrar una manera" de negociar el nuevu estatus de Reinu Uníu nun bloque que decidió abandonar.

Asina, ante la rocea apareyada a un procesu sin precedentes, Cameron tresmitió un mensaxe a los 1,2 millones de británicos residentes n'otros países de la UE y a los cerca de trés millones de ciudadanos comunitarios afincaos nes isles. "Nun habrá cambios inmediatos nes vueses circunstancies", como tampoco "na manera en que la xente viaxa, en cómo se mueven los bienes" y el capital, sorrayó.