"Lo que deben de saber los diputaos y ciudadanos británicos ye que nun habrá nengún tipu de renegociación (...). Fuera ye fuera", declaró nuna comparecencia ante la prensa en Bruxeles.

El xefe del Executivu comunitariu refirióse al acuerdu negociáu por David Cameron col restu de líderes europeos el pasáu febreru, que va permitir, ente otres coses, discriminar a los inmigrantes europeos nel pagu de determinaes ayudes sociales.

"Él llogró lo máximo que podía recibir y nós dimos lo máximo que podíamos dar, asina que nun habrá nengún tipu de renegociación", indicó Juncker, n'alusión a que si los británicos voten a favor de dexar la UE, esi pactu nun será aplicable, nin abrirá la puerta a una nueva negociación que nun pase pela salida del club comunitariu.

L'exprimer ministru luxemburgués repitió que "sería bueno" que Reinu Uníu siguiera siendo parte de la Unión Europea, de la que llamentó que l'acuerdu negociáu en febreru y que meyora l'estatus británicu ente los 28 "nun tea xugando un papel na campaña".

Otra manera, Juncker evitó entrar en detalle nel impactu d'un eventual 'Brexit' o nes consecuencies qu'ello diba tener pa la integración europea.

El xefe del Executivu comunitariu pidió esperar a que los británicos se pronuncie y conocer el resultáu. Esti vienres, Juncker va recibir na sede de la Comisión Europea al presidente del Conseyu, Donald Tusk; al presidente del Parlamentu Européu, Martin Schulz, y al primer ministru holandés y presidente de turnu de la UE, Mark Rutte, p'analizar la situación.

La xunta ta prevista a les 10.30 hores, cuando yá se conozan los resultaos, y espérase d'ellos que fixen una primer respuesta común al pronunciamientu de los británicos.