En delles entrevistes en medios de comunicación, los candidatos de los trés partíos esixeron la retirada de Fernández Díaz dempués de les grabaciones desvelaes pol diariu 'Público' y toos ellos recordaron anteriores escándalos del ministru.

El secretariu xeneral del PSOE defendió que Fernández Díaz tien qu'abandonar "la vida política" y caltuvo que tuvo de dimitir yá cuando se supo que tuvo, el branu pasáu, "una xunta secreta" nel so despachu col exvicepresidente del Gobiernu Rodrigo Rato, investigáu pola fusión y salida a Bolsa de Bankia y pol so patrimoniu personal.

"Un ministru del Interior nun pue reunise con un imputáu y agora nun tien más xustificación pa siguir nel cargu", dixo nuna entrevista na Cadena Cope, recoyida por Europa Press.

Tamién Pablo Iglesias cree que'l ministru en funciones tendría que dimitir "darréu" poles conversaciones que caltuvo con Daniel de Alfonso y que reflexen una presunta conspiración contra partíos independentistes.

"Escuché les grabaciones y vemos a un ministru del Interior que se supón que tien que protexenos a toos aparentemente utilizando'l so cargu pa investigar a rivales políticos. Eso tendría qu'implicar dimisión darréu", manifestó nuna entrevista en 'Los Almuerzos de TVE recoyida por Europa Press.

RIVERA PIDE ESPLICACIONES A RAJOY

El líder de Ciudadanos sumóse a esti pidimientu de dimisión si los protagonistes de les grabaciones son realmente Fernández Díaz y De Alfonso y esixó al presidente del Gobiernu en funciones, Mariano Rajoy, qu'esclare si "taba al corriente" de lo que facía'l so ministru d'Interior.

Al so xuiciu, "seríen palabres mayores" si'l xefe del Executivu "taba al corriente d'esa trama pa utilizala políticamente contra partíos de la oposición". Ello ye que reveló que pidió al so Grupu Parlamentariu qu'estudie si hai mecanismos xurídicos pa facer comparecer a Rajoy o a Fernández Díaz y, en constatando qu'hai dificultaes xurídiques, pidió a Rajoy una esplicación política ante los medios de comunicación.