Un total de 638.770 neños podríen salir de la probeza si aumentara la prestación por fíu al cargu de 24,25 euros al mes a 100, según cálculos realizaos por Save the Children. Pa la organización, n'España los datos de probeza infantil son "inaceptables" porque "unu de cada trés neños" vive nesa situación.
La organización calculó'l costu d'esti aumentu de la prestación y el resultáu ye l'equivalente al 0'41% del PIB (4.304 millones d'euros). Sicasí, "España nun llegaría a la media europea d'inversión en polítiques d'infancia", aportunó la ONG.
Según los últimos datos d'Eurostat, España invierte'l 1,3% del so PIB en protección social a la familia ya infancia; lloñe de la media europea del 2,4% y "bien lloñe de la inversión de países vecinos" como Francia que dedica un 2,5% del so PIB a la protección social de la infancia y la familia "con una probeza infantil que ye prácticamente la metá de la española", y Dinamarca "un 3,7%". Amás, Save The Children recordó que de los 28 países miembros de la UE, España alcuéntrase en tercer posición en probeza infantil, namás per detrás de Rumanía y Bulgaria.
La ONG entiende que, "sin una mayor inversión y voluntá político, el 80% d'estos neños que viven en situación de probeza van siguir faciéndolo cuando seyan mayores y los sos fíos van heredar el problema". Por eso, considera qu'acabar cola probeza infantil, "especialmente la severa" (casi 1.390.000 neños), tendría que ser "una prioridá pal Gobiernu resultante de les próximes elecciones".
