El presidente del Gobiernu en funciones y candidatu del PP a la reelección, Mariano Rajoy, aseguró esti xueves que "nun-y presta" que'l primer ministru británicu, David Cameron, vaya a Xibraltar pa facer campaña sobre la permanencia de Reinu Uníu na UE y calcó en que la campaña tendría que facela ellí y non en Xibraltar.
"Al Gobiernu nun-y presta que'l señor Cameron vaya a Xibraltar, lo que s'alderique ye que Reinu Uníu queda na UE o sal de la UE y la campaña pa eso tendría que facese en Reinu Uníu y non en Xibraltar", afirmó atayante Rajoy nuna entrevista en RNE, que recoyó Europa Press.
N'asegurando qu'hai que ver lo que pasa la próxima selmana nel referendu, recalcó que pa España, Xibraltar ye "español gane'l 'Brexit o se pierda". Eso sí, señaló que la salida de Reinu Uníu de la UE "diba ser un pasu atrás" y un "retrocesu" y fairía "muncu dañu" tantu a la economía británica, que "tardaría munchu tiempu en recuperase", como a les demás economíes.
A preguntes sobre si va treslladar dalguna quexa o protesta diplomática pola visita de Cameron a Xibraltar, Rajoy dixo que non porque "yá lo saben" y, ello ye que señaló qu'esi malestar yá-y lu treslladaron esti miércoles nes conversaciones que caltuvieron los gabinetes de dambos gobiernos y cola Embaxada. "Yá saben perfectamente cuála ye la posición del nuesu país", resaltó.
