UVIÉU, E.P.-L'asociación Iniciativa pol Asturianu acusó esti miércoles a la dirección del Colexu Públicu Buenavista II (Uviéu) de incluyir "dos falsedaes" nuna carta enviada a les families del alumnáu que pasa a Primaria nel cursu qu'entra, col envís d'evitar les matrícules en llingua asturiana.

Nuna nota prensa, Iniciativa esplica que la señalada "circular informa de les condiciones nes que se da l'asignatura de Llingua Asturiana". "Nesti documentu hai, pelo menos, dos falsedaes que dende Iniciativa pol Asturianu cuidamos tán cuntaes pa torgar les matrícules na asignatura d'asturianu: per un llau, la dirección del centru diz que tien qu'haber una matriculación mínima de 10 alumnos, argumentu falsu dafechu", esplica la nota.

Pel otru llau, el documentu informa a les families de que "l'asignatura d'asturianu y la alternativa (Cultura Asturiana) danse en dos sesiones a la selmana de 45' minutos caúna que tán sacaes d'asignatures d'otres arées llingüístiques y de Conocimientu del Mediu", cita l'asociación. Esta aseveración, según Iniciativa, "tamién ye alsa dafechu, teniendo en cuenta que l'asignatura d'asturianu lleva nes escueles de magar l'añu 1984 p'acá, polo que Llingua Asturiana lleva dándose alredor de venti años nes hores que-y pertenecen únicamente a l'asignatura de Llingua Asturiana".

Iniciativa pol Asturianu entiende "qu'esti ye un casu más de tantos nos que'l deséu personal d'ún o varios cargos del equipu directivu d'un centru que ta financiáu con dineru públicu consiguen torgar los drechos fundamentales que tienen por llei tolos escolinos asturianos a recibir enseñu de la llingua propia si asina quieren ellos y les families".

Dende l'asociación condenen "esta mena d'actuaciones y encamentamos a los equipos directivos, al profesoráu, a les families, al alumnáu y a cualesquier otra persona que perteneza a la sociedá asturiana que denuncie ensin miramientos esti tipu d'acciones illegales como lo facemos nós". "Tamién tenemos un encamientu especial pa que les entidaes pertinentes, como son la Conseyería d'Educación o los sindicatos, velen por esti drechu de tolos asturianos a formase na llingua de so", acaba la nota.