"Unu de los soldaos del califatu n'América llevó a cabu una invasión de seguridá onde foi capaz d'entrar nuna xunta de cruzaos nun club nocherniegu pa homosexuales n'Orlando, Florida (...) onde mató y firió a más d'un centenar d'ellos antes de que lu abatieren", afirmó la organización terrorista na so emisión radiofónica.

Esti domingu, l'axencia de noticies Amaq, vinculada a Estáu Islámicu, yá atribuyera a esti grupu terrorista l'autoría, afirmando que Mateen, un estaounidense de padres afganos, yera "un combatiente" de la organización.

Les autoridaes estaounidenses señalaron que tovía nun detectaron pruebes que vinculen a Estáu Islámicu cola matanza asocedida nel club Pulsie d'Orlando, el mayor atentáu en suelu estaounidense dende'l 11-S.

Un responsable del FBI consultáu por Reuters alvirtió qu'anque Mateen podría tener un ciertu enclín hacia Estáu Islámicu, habrá qu'investigar en fondura.

Trés responsables estaounidenses conocedores de la investigación señalaron a Reuters que nun hai pruebes tovía que demuestren una relación directa con Estáu Islámicu o cualquier otru grupu islamista. "Hasta agora lo que sabemos ye que'l so primer contactu directu foi una promesa de 'bayat' (llealtá) que fizo mientres la masacre", esplicó un oficial de la llucha antiterrorista, en referencia a la llamada a la Policía fecha mientres l'ataque.

Otru responsable d'Intelixencia reconoció que cabía esperar qu'Estáu Islámicu reivindicara l'autoría, puesto que'l grupu terrorista tuvo sufriendo reveses nos sos territorios n'Iraq y Siria.

"El fechu de qu'una web vinculada con Daesh aplauda nun significa nada", señalara esti responsable, primero que se produxera la emisión n'Al Bayan.

Dos de les fontes conocedores de la investigación afirmaron qu'una de les hipótesis que s'embaraxen con más fuerza ye que'l sospechosu actuara en cierta midida inspiráu polos milicianos islamistes.