Na so calificación previa al xuiciu, los fiscales Fernando Maldonado y Teresa Duerto acusen al fíu del expresidente de la Generalitat de los delitos de tráficu d'influencies, pol que pide dos años; sobornu, pol que solicita un añu y dos meses, y falsedá continuada en documentu mercantil, polo que demanda dos años más.

Ta acusáu d'usar la so influencia política pa beneficiar a determinaos empresarios del sector de les ITV y, amás, de cobrar d'un empresariu amigu pola so intermediación con pagos camuflaos como trabayos d'asesoría a la so muyer, que presuntamente ella nunca fizo.

Anna Vidal cobró, del 2010 al 2012, 443.660 euros por servicios contrataos y non emprestaos al empresariu amigu íntimu del políticu y tamién acusáu Sergi Alsina, porque en realidá, según Fiscalía, la intención yera camuflar "la inestimable collaboración" d'Oriol Pujol pola so influencia política.

Alsina contratáronlu nel 2010 como asesor por una sociedá que quería vender la so planta industrial en Sant Cugat del Vallès (Barcelona) pa que lu ayudara a buscar un comprador; Alsina, de la mesma, fizo pagos los pagos a Anna Vidal, supuestamente por collaborar con él nestos trabayos.

Sicasí, el llabor de la muyer d'Oriol Pujol "llendóse a apurrir información manuscrita con apuntes y referencies sobre les empreses candidates --a la compra--, fácilmente obtenibles n'Internet", según l'escritu d'acusación.

Lo que presuntamente se pagaba yera la intervención d'Oriol Pujol, que foi "intensa, decisiva y claramente beneficiosa pa los implicaos gracies a los relevantes cargos políticos qu'ostentaba", dao que los fiscales creen qu'intervieno nes negociaciones.

"Gracies al llabor fundamental del acusáu Oriol Pujol Ferrusola, la operación mercantil pa la que lu contrató la empresa del acusáu Sergi Alsina Jiménez, tuvo un éxitu esperáu", considea'l Ministeriu Públicu.

Lo mesmo pasó cuando a Alsina lu contrataron a últimos del 2010 pa la creación d'un parque de proveedores del sector del automóvil en Sant Esteve Sesrovires (Barcelona); otra vuelta, Vidal cobró d'esti empresariu cuando'l so trabayu llendóse a apurrir información manuscrita "ellaborada por otres persones, carente de valor".

FAVORECER A EMPRESARIOS

Per otra parte, Oriol Pujol presuntamente favoreció dende'l 2010 a un grupu d'empresarios del sector de les ITV: planteó activamente que la Generalitat contratara a Josep Tous, pa solucionar el complexu mapa y diseñar el plan territorial de les estaciones d'ITV.

Supuestamente aprovechó la so doble condición de presidente de CiU nel Parlament y de secretariu xeneral de CDC: según los fiscales, el so interés pa designar a Tous yera pol tamién interés d'Alsina de que Tous favoreciera los intereses privaos d'otru empresariu acusáu, Ricard Puignou, na negociación sobre les estaciones.

El supuestu plan yera'l siguiente: Alsina y el tamién acusáu Sergi Pastor constituyeron una sociedá pa que presuntamente fuera beneficiada pol repartu d'estaciones aprovechándose d'acuerdos con Tous y de "les influencies polítiques d'Oriol Pujol".

Según Fiscalía, el políticu tamién pudo tener un porcentaxe de la sociedá, anque l'espardimientu na prensa de que-yos investigaben fizo que nun consiguieren los sos oxetivos.