La plataforma de pirates informáticos Anonymous publicó los datos personales de 5.400 axentes de la Policía Nacional en protesta pola aprobación de la Llei de Seguridá Ciudadana a la que se refieren como Llei Mordaza. "España ye l'únicu país de la Unión Europea que permite y aplica la censura. ¡Nós, Anonymous, nun podemos tolerar esti comportamientu!", protesten.
Los datos de los axentes estrayéronse piratiando la páxina web de Mupol Mutualidá de Previsión Social de la Policía a la que tán afiliaos unos 17.000 axentes. Fontes de la Dirección Xeneral de la Policía confirmaron a Europa Press que la so Unidá d'Investigación Tecnolóxica (UIT) yá entamó una investigación pa detectar a los responsables d'esti ataque.
"Güei vamos a centranos n'usté, la xente d'España. Vivís nun país formosu, con llugares formosos. ¡Sois bona xente!", dicen Anonymous pa los que, sicasí, la Llei Mordaza asitia al país "nun grupu esclusivu de los estaos dictatoriales qu'apliquen la censura, y nieguen la llibertá d'espresión y los derechos humanos básicos, grupu que tamién ta formáu por Bielorrusia, Rusia, Sudán, Etiopía, Cuba".
Tamién carguen contra la Policía: "Cuerpu de Policía Nacional d'España, qu'intentó facer dañu a los nuesos hermanos con cargos falsos que namás demuestren cómo la so institución ta podrecida". Nel añu 2011 la Policía llevó a cabu una operación na que, según dixo, desarticuló la cúpula d'Anonymous n'España col arrestu de trés persones a les qu'acusó de ser los máximos responsables del colectivu.
ACCIÓN-REACCIÓN
Los pirates informáticos anuncien la publicación d'estos datos personales de los policíes "col fin de facer qu'entiendan lo delgada que ye la cortina (o'l pasamontañes) detrás del que s'escuenden". "Con cada acción vien una reacción contraria y toos tenemos que pagar polos nuesos actos", añaden nun comunicáu recoyíu por Europa Press, publicáu colos datos de los axentes al traviés de la cuenta de twitter FkPoliceAnonOps.
Según espliquen publicóse la información correspondiente a "aprosimao 5.400 miembros de la Policía". La filtración de datos afecta a les sos identidaes, los sos númberos d'identificación, correos electrónicos y les sos contraseñes. L'oxetivu, dicen, yera mupol.es, al que definen como "un fondu d'inversión pa los policíes españoles".
En realidá, Mupol ye una mutua creada nel so día pola Dirección Xeneral de la Policía, que nesti momentu actúa como entidá privada sin ánimu d'arriquecimientu y na que tán afiliaos 17.000 policíes, según esplicó en declaraciones a Europa Press el presidente de la entidá Julián González.
17.000 AFILIAOS
"Enterámonos esta mañana cuando abrimos la páxina web, ayeri funcionaba perfectamente", relata González, qu'esclara que los pirates informáticos nun llograron acceder a la base de datos central de la mutua, dao qu'a ella nun pue accedese con contraseña, sinón certificáu dixital, una torga más difícil de devasar.
A los que llograron acceder, según el presidente de Mupol ye a los datos que s'inclúin nun formulariu previu que tienen que rellenar toos aquéllos que quieren afiliase a la mutua. Confirma González que nesi formulariu previu había datos d'aprosimao 5.400 axentes.
"Ye una fadiada", llamenta de la qu'informa de que yá presentaron una denuncia "pa que la Policía puea detectar a estos caradures". Celebra sicasí'l presidente de Mupol que los pirates nun pudieren acceder a la base de datos centrales nes que, según diz, hai datos económicos ya información más sensible.
