L'Audiencia Provincial d'Asturies condenó a dos Policíes Locales d'Avilés a la pena de seis meses de prisión y a un terceru a trés meses de cárcel por un delitu d'amenaces contra un home que se moflara y realizara tratos vexatorios al fíu d'unu de los axentes que sufre una minusvalía psíquica del 65%.
Los fechos asocedieron nel 2014 cuando un home moflóse del fíu d'unu de los axentes acusaos na parada del autobús de la cai Llano Ponte d'Avilés. Nuna ocasión díxo-y te pago diez euros si "me chupes la trompa" y n'otres apagó-y un pitu nel capiellu y na manga de la cazadora.
Los trés axentes acusaos al conocer los fechos ya identificar al autor de les burlles, garráronlu y lleváronlu en coche patrulla a una nave abandonada onde-y dixeron, en baxándolu del vehículu y ponelu contra una paré, que-y diben pegar un tiru y tiralu a una cuneta.
Darréu lleváronlu a les dependencies de la Policía Nacional onde tuvo una hora na sala d'espera hasta que lu identificaron. Una vez ellí unu de los axentes d'ámbitu llocal díxo-y qu'esta vez llibrárase pero qu'anduviera con cuidáu.
Mientres el trayectu nel vehículu policial tamién foi oxetu d'insultos, recriminaciones y amenaces de muerte, lo mesmo qu'en dependencies policiales, onde unu de los axentes mostró-y una bala que sacó del cargador de la so arma, y preguntó-y el so nome p'apuntalu nella.
