La Comisión Europea aplazó hasta primeros de xunetu la decisión que tien que tomar pa certificar o non la falta "d'acción efectiva" d'España pa cumplir coles perspectives de déficit del 2015, qu'entamaría'l procesu pa imponer una multa a España del 0,2% del PIB, unos 2.000 millones d'euros.
Amás, l'Executivu comunitariu propunxo otorgar a España un añu más, hasta'l 2017, pa cumplir cola meta d'amenorgar el desfase presupuestariu perbaxo del 3%. Asina, tendrá qu'amenorgar el déficit nes cuentes públiques hasta'l 2,5% al zarru del añu qu'entra.
El colexu de comisarios del Executivu comunitariu reunióse esti miércoles p'aldericar si España y Portugal tomaron acciones efectives pa cumplir coles mires de déficit del 2015. Sicasí, Bruxeles decidió aplazar la decisión final sobre esta cuestión en dambos casos.
D'esta manera, el procesu que desencadenaría nuna sanción entamaría dempués de les elecciones xenerales, que van tener llugar el próximu 26 de xunu.
El comisariu d'Asuntos Económicos y Monetarios, Pierre Moscovici, esplicó que "nun ye'l momentu afayaízu nin económica nin políticamente". "Hubo muncha especulación sobre si nesta fase díbamos proponer un pasu más nel procedimientu de déficit escesivu pa dambos países (...). Consideramos que nun ye'l momentu apropiáu nin política nin económicamente pa dar esti pasu", señaló.
Amás, el comisariu francés apuntó na mesma comparecencia que, tres dos reuniones, el Colexu de comisarios tuvo en cuenta'l momentu del ciclu económicu y qu'España y Portugal "son dos países que sufrieron la crisis de plenu, que la so tasa de paru sigue siendo desaxeradamente elevada y que ficieron esfuerzos significativos en materia de reformes".
Na mesma llinia, recordó la elecciones xenerales del próximu 26 de xunu y argumentó que nesti momentu nun hai n'España un Executivu "que seya capaz, hasta agora, de tomar les midíes que son necesaries".
Pela so parte, preguntáu pola intención de Rajoy d'acometer una nueva rebaxa fiscal en casu de volver salir escoyíu presidente del Gobiernu tres les elecciones, el vicepresidente de la Comisión Europea pal Euru, Valdis Dombrovskis, apuntó que correspuende a España "tomar les sos propies decisiones sobre fiscalidá", mientres que cumpla colos oxetivos marcaos.
PIDE UN AXUSTE DE 8.000 MILLONES EN DOS AÑOS
Coles mesmes, la Comisión Europea propunxo una nueva ruta d'amenorgamientu del déficit que prevé una rebaxa del mesmu hasta'l 3,7% del PIB nel 2016 y hasta el 2,5% l'añu qu'entra. Estos nuevos oxetivos contraste coles previsiones del Gobiernu en funciones incluyíes nel Plan d'Estabilidá, que prevé un déficit del 3,6% anguaño y del 2,9% nel 2017.
Pa ello, l'Executivu comunitariu pide que se tomen "les midíes estructurales necesaries" y reclama un esfuerzu estructural del 0,75% del PIB, unos 8.000 millones d'euros, en dos años (del 0,25% en 2016 y del 0,50%) nel 2017.
