El 7 de mayu Gasteiz va acoyer les distintes actividaes del festival y los conciertos de Juantxo Skalari & LRB, La Tarrancha, Solombra y Olatz Salvador

Vuelve Glayíos/Oihuak, el ciclu de conciertos de bandes d’Asturies y País Vascu. En 2015 tocaron n'Uviéu los grupos vascos Skakeitan, Niña Coyote eta Chico Tornado, Rat-Zinger, Gose y Suaia eta La Haine, xunto a los asturianos Skama la Rede, Sombra, Skontra, Fabes de Mayo y La Tarrancha. Esti 2016 delles d'estes bandes volverán compartir escenariu nel País Vascu dientro de los Glayíos/Oihuak Fest. El primeru d'ellos va ser el 7 de mayu en Gasteiz.

Un viaxe Asturies-Gasteiz en bus, triki-gaita poteoa (pasucais per chigres animáu con gaita y trikitixa), xinta popular, xuegos tradicionales y mercadín de colectivos asturianos van ser les actividaes que va ufiertar el Glayíos/Oihuak Fest mientres el día en distintos puntos del cascu vieyu gasteiztarra. Va ser el calentamientu -acompañáu en tou momentu por gastronomía asturiana, sidra ecolóxico L’Allume y cerveza artesano Caleya-, pa los conciertos de la nueche.

A les 19.00 va empezar l'actuación d’Olatz Salvador, cantautora euskaldun que ye a la par teclista de Skakeitan (banda que yá participó en Glayíos). Siguirá-y Sombra, tríu uvieín de stoner y psicodelia que va poner los soníos más contundentes de la nueche. El ska-fusión de los asturianos La Tarrancha va facer baillar al públicu antes de cerrar los conciertos con Juantxo Skalari & La Rude Band, el nuevu proyectu del que fuera cantante de la mítica banda Skalariak.

Precios populares y CD de regalu

Tolos precios pa les actividaes van tener un calter popular. El viaxe día-vuelta dende Asturies en bus más comida y entrada al conciertu va costar 25 € (los tickets véndense en dellos locales de la zona central asturiana),  mientres que'l bonu pa la xinta y la entrada suelta tienen un preciu de 5 € cadún (a la venta en chigres del cascu vieyu de Gasteiz).

Amás, a toles persones qu'asistan va regaláse-yos el CD ‘Recopilatoriu Glayíos/Oihuak 2015 Konpilazioa’, un discu qu'axunta venti cantares de toles bandes que tocaron l'añu pasáu en Glayíos/Oihuak Música en Movimientu· Herriak Mugitzen, esti ciclu d'intercambios musicales entamáu pola asociación d'asturianos emigraos al País Vascu Ixuxú Asturies-Euskal Herria elkartea.

Más info en:
facebook.com/glayios – www.glayios.com

/ Programación / 07.00. Salida del bus dende Asturies / 13.00. Pasucais per chigres con música / 15.00 Xinta Popular / 17.00 Xuegos tradicionales asturianos + mercadín de colectivos / 19.00 Conciertos de Olatz Salvador (cantautora - eh), Sombra (stoner-psicodelia - ast), La Tarrancha (ska-fusión - ast), Juantxo Skalari & La Rude Band (ska - eh/cat)

/ Entraes / Conciertu: 5 €  (CD Recopilatoriu Glayíos/Oihuak 2015 konpilazioa de regalo)

Ticket xinta: 5 € (a la venta en: txinbo, aranba, hala bedi taberna, garraxi, txapelarri y gasteizko gaztetxea)

Viaxe Asturies-Gasteiz ida-vuelta + xinta + entrada + CD: 25 € (a la venta en Chigre Ochobre –L’Entregu-, Matteria –La Felguera-, L’Esperteyu y Llar La Llegra –Uviéu-, Sidrería Canteli y Cs La Llume –Xixón-)