"Nel marcu del espediente relativu a los atentaos de París del 13 de payares del 2015, a Salah Abdeslam entregáronlu esta mañana a les autoridaes franceses, cumpliendo la orde europea de detención dictada'l 19 de marzu", informó la Fiscalía nun cortu comunicáu.

   Dellos medios belgues indiquen que la entrega prodúxose mientres la madrugada, pero la Fiscalía alvirtió que nun va dar más detalles sobre les circunstancies de la estradición.

   Les autoridaes belgues yá avisaron va selmanes de que, por razones de seguridá, nun comunicaríen nenguna información sobre la estradición del terrorista, que permanecía hasta agora nuna célula d'alta seguridá na prisión de Bruxes.

   Abdeslam confesó nos interrogatorios que formó parte del comandu qu'atentó en París y dexó 130 muertos nuna cadena d'ataques contra restoranes y una sala de fiestes na nueche del 13 de payares.

   Tamién lu relacionen colos terroristes qu'atentaron en Bruxeles el 22 de marzu, díes dempués del so arrestu nel barriu bruselense de Sint-Jans-Molenbeek, anque él negó que tuviera al tantu del plan d'atacar la capital europea.

   En Francia, Abdeslam va tar defendíu por Fanck Berton, un lletráu francés conocíu nel so país por defender otros casos mediáticos.

   Díes antes de la estradición del so nuevu defendíu, Berton aseguró en declaraciones a la prensa qu'Abdeslam taba "deseosu d'esplicase" ante les autoridaes gales.