La Sala de lo Penal del Tribunal Supremu acordó esti martes abrir causa a la diputada de Podemos polos delitos de sobornu, prevaricación y retrasu maldadosu na alministración de xusticia al almitir parte de la querella interpuesta contra ella pol anterior ministru d'Industria José Manuel Soria por irregularidaes na so forma d'instruyir el procedimientu abiertu en Les Palmes de Gran Canaria contra un empresariu.

   El xuez que lu sustituyó nel Xulgáu d'instrucción númberu 8 de Les Palmes, Salvador Alba, alvirtió de graves irregularidaes na forma na que Rosell investigó una causa contra'l presidente de la UD Las Palmas, Miguel Ángel Ramírez, col que la so pareya, el periodista Carlos Sosa, negociaba la compra d'una emisora de radio por cerca de 300.000 euros.

NAMÁS VA SER DIPUTADA HASTA'L LLUNES

   A Rosell, vocera de Xusticia del grupu parlamentariu de Podemos, incluyéronla como vocal suplente na Diputación Permanente del Congresu. Los sos integrantes van ser los únicos que se caltengan como diputaos y aforaos cuando se formalice la disolución de les Cortes el próximu día 3 de mayu.

   Agora, tres la decisión del Supremu d'abrir la investigación, Rosell decidió renunciar a esi puestu na Diputación Permanente, colo que de magar el día 3 va dexar de ser diputada y, poro, va perder esi aforamientu políticu.

   Eso sí, na so condición de xueza sigue siendo aforada como titular d'un xulgáu d'Instrucción, polo que'l so casu yá nun correspondería al Tribunal Supremu y pasaría al Tribunal Superior de Xusticia de Canaries, según indicaron a Europa Press fontes xurídiques.

   Al caltener el so escañu hasta les 23.59 hores del día 2, Rosell va poder asistir esti mesmu vienres na Comisión de Xusticia del Congresu a la comparecencia del presidente del Conseyu Xeneral del Poder Xudicial (CGPJ), Carlos Lesmes, que precisamente tamién preside'l Tribunal Supremu.