Madrid (E.P.).-El secretariu xeneral de Podemos, Pablo Iglesias, responsabilizó al PSOE y al so líder, Pedro Sánchez, d'atayar una vez más la posibilidá formar un gobiernu de coalición 'a la valenciana' al caltener el so pactu con Ciudadanos y dicir que 'Non' al 'Acuerdu d'El Prado', que Compromís punxo enriba de la mesa a última hora. Al so xuiciu, los socialistes plantegaron una "contraufierta" que nun ye "seria" nin "coherente".
"Creo que colos ciudadanos hai que ser serios y coherentes. La política nun pue ser un casinu nin una partida de póker. Nós fuimos bien coherentes dende lo primero, asumiendo que podía haber cesiones", defendió na rueda de prensa qu'ofreció nel Congresu, tres reunise col Rei na Zarzuela.
Nesti sen, Iglesias criticó que, frente a "la propuesta sensata" de Compromís --"un bon esfuerzu" pa llograr un acuerdu, al so paecer--, la respuesta del PSOE volvió ser el 'Non' al gobiernu de coalición y pidir más "cheques en blanco" pa un Executivu de Sánchez en solitario, basáu nel so acuerdu con Ciudadanos.
"El tiempu de los cheques en blanco y les imposiciones acabó", sentenció, de la que llamentó que Sánchez dixo yá "demasiaos 'nones'". "Ye triste que la respuesta del PSOE fuera que non", repitió, p'añadir que, por ello, entiende "la frustración" que manifestó la líder de Compromís, Mónica Oltra.
"¿DE QUÉ VAN?"
Ello ye qu'Iglesias fizo suyes les palabres de la vicepresidenta de la Comunidá Valenciana, que calificó de "insultante" la contraufierta del PSOE al 'Acuerdu d'El Prado'. "¿De qué van? Con 90 diputaos, cuando les otres cinco fuerces suman 71, ¿cómo quieren pretender tener un gobiernu en solitariu?", denunció Oltra.
Nesta llínea, el líder de Podemos defendió, al igual que la vicepresidenta valenciana, que la respuesta del PSOE "nun ye seria" y supon "perder" la oportunidá" que se-yos dio pa formar gobiernu. "Nun aprovecharon la posibilidá d'estrechar la mano que se-yos volvió tender", repostió.
Sicasí, Iglesias aseguró que la so formación sigue tendiendo la mano al PSOE pa formar un gobiernu de coalición y que siguen "esperando" que rectifiquen, y nun quiso dar por fechu la repetición d'elecciones. "Siguimos esperando a que'l PSOE dea esi pasu y salga de la xaula na que lu zarraron", afirmó.
