Más de cien de persones del mundu de la cultura y la universidá ficieron públicu un manifiestu col que piden a Podemos, a les sos confluencies y a Izquierda Unida-Unidá Popular que, nel casu de que se repitan a lo último les elecciones xenerales en xunu, pónganse d'acuerdu p'acudir baxo una "única opción electoral".
"El momentu ye agora. Podemos, IU y les confluencies diverses fueron capaces de solmenar inercies y conectar con millones de ciudadanes y ciudadanos fartos de la vieya política y de los abusos de los poderosos: estes formaciones ganáronse autoridá pa encabezar el procesu", defenden los firmantes del llamáu, tituláu 'Pola confluencia política y electoral de les fuerces del cambiu nel estáu español'.
Ente los que soscriben estes palabres figuren cares conocíes de la izquierda cultural. Dalgunos d'ellos yá firmaron en xunetu del 2015 un manifiestu asemeyáu que reclamaba una plataforma d'unidá popular.
Nel llistáu apaecen actores como Juan Diego, Alberto San Juan, Carlos Bardem, Antonio de la Torre, José Sacristán, Fernando Tejero, Eduard Fernández, Juan Diego Botto, Luis Tosar, Antonia San Juan, Pepe Viyuela y Bárbara Lennie. Tamién roblen los directores de cine Icíar Bollaín, Miguel Albadalejo, Benito Zambrano y Daniel Guzmán, y los músicos Ismael Serrano, Josele Santiago, Amparo Sánchez (Amparanoia), Coque Malla y Santiago Auserón (acabante de salir escoyíu pregoneru de San Isidro nel Conceyu de Madrid).
LA DENUNCIANTE DE GÜRTEL
Apaecen igualmente la ex técnicu del conceyu de Boadilla que denunció la Gürtel, Ana Garrido; profesionales de los medios como'l presentador Gran Wyoming o los periodistes Olga Rodríguez o Javier Gallego 'Crudo'; y profesores universitarios como Carlos Fernández Liria, José Luis Gordillo, Daniel Reventós, José Antonio Nieto, Jordi Roca y Fernando Luengo.
Según los firmantes, ye preciso "axuntar nuna articulación política común" el "dinamismu" de Podemos y de les distintes confluencies d'organizaciones y activistes procedentes de movimientos sociales, xunto cola "esperiencia militante ya institucional" d'Izquierda Unida y la Unidá Popular.
"Nun nos importa qué fórmula s'adopte, siempre y cuando se reflexen na práctica los principios de democracia interna, plurinacionalidá, participación activa de los qu'apoyen la iniciativa y respetu al pluralismu nun marcu que tienda hacia una nueva organización política, un partíu-movimientu que lo seya de verdá, más allá de la retórica y los bonos deseos", defenden.
"RECONOCENCIA" DE TOOS
Por too ello, avisen que nesta confluencia "nun sobra naide y tol mundu tien que recibir reconocencia poles sos aportaciones específiques a la resistencia frente a la oligarquía y los sos axentes políticos". "La xenerosidá, la responsabilidá y l'espíritu cooperativu tienen que presidir el procesu", planteguen.
"Ye esencial construyir un instrumentu al empar estable y áxil pa la defensa de los d'abaxoy la irrupción d'éstos na esfera política. El malestar y la desesperación de les y los desfavorecíos obliguen a unise pa construyir l'instrumentu pal cambiu", recalquen.
Nesti sen, acaben el so manifiestu recalcando en que, al so xuiciu, "fai falta disponer d'una ferramienta política capaz de tornar les polítiques austeritaries, promover los procesos constituyentes democráticos y frenar l'ecocidiu". "Nun entenderíamos que personalismos, prexuicios enquistaos o mentalidaes sectaries ficieren albortar l'esfuerzu unitariu", alvierten.
