"Si nun ye esti mes, nos primeros díes de mayu eses persones van tar identificaes y esos 200 reasitiaos procedentes de Grecia ya Italia van tar n'España", esplicó Fernández Díaz en declaraciones a la prensa, a la so llegada a una xunta de ministros d'Interior de la UE en Luxemburgu.

   El ministru matizó dempués que van ser unos 200 los acoyíos al cabu de los primeros díes de mayu, contando colos 18 yá treslladaos a España dende Italia a últimos del 2015, fecha del últimu procesu de reubicación puestu en práctica pol Gobiernu nel marcu del plan européu pa dar acoyida nel restu d'Estaos miembros a 160.000 solicitantes de protección internacional llegaos a Italia y Grecia.

   A esti compromisu suma la disposición p'acoyer nos próximos meses a 285 refuxaos sirios instalaos en Turquía, como parte del acuerdu que la Unión Europea zarró con Ankara pa qu'esti país contenga'l pasu d'inmigrantes a territoriu comunitariu.

   Fernández Díaz recordó qu'España prepara tamién el treslláu del 285 refuxaos sirios dende Turquía, a los qu'esti xueves anunció que van sumase otres 100 places pa entamar la participación española nel sistema 'ún por ún', pol que la UE recibe a un refuxáu siriu por cada deportáu d'esta nacionalidá a Turquía.

   En total, el ministru d'Interior estima que "nestos meses" España va dar acoyida a un total de 585 refuxaos, ente demandantes d'asilu en Grecia ya Italia y refuxaos en Turquía, lo que revisa al alza la cifra de 450 persones que'l Gobiernu notificó en marzu a la Comisión Europea y al Altu Comisionáu de Naciones Uníes pa los Refuxaos (Acnur).