El Ministeriu Públicu confirmó'l descubrimentu de 570 cuerpos sin vida, de los qu'a 526 identificáronlos y entregáronlos a los sos familiares --ente ellos 13 ciudadanos estranxeros--. Otros 44 tovía tán nun procesu de verificación d'identidá.

   Amás, hai 4.605 mancaos y 107 desapaecíos, polo que les autoridaes nun refuguen que la cifra de muertos puea aumentar según pasen les hores, al tiempu que s'amenorguen les posibilidaes de que los equipos de rescate alcuentren a persones con vida so los escombros.

   Nesti tráxicu contestu, el presidente d'Ecuador, Rafael Correa, dio por inaugurada la segunda etapa de respuesta al desastre natural, centrada n'atender a los damnificaos. Sobre'l terrenu hai 8.300 militares, 4.500 policíes, 4.000 médicos y 1.500 voluntarios, a los que se sumen 941 efectivos procedentes d'una ventena de países.

   Correa repitió que "unu de los mayores problemes ye l'ayuda desorganizada", polo que pidió a los voluntarios que contacten colos servicios d'emerxencia pa saber "cuálos son los requerimientos" antes d'actuar pola so cuenta. "Non solo ye necesario querer ayudar, hai que saber collaborar", caltuvo.

   La siguiente fase va ser facer un balance de los inmuebles baltaos y los daños estructurales causaos nos que siguen de pies pa planiar la reconstrucción. "Pero nun nos engañemos, esto va tomar años", alvirtió, por cuenta de qu'en delles zones la destrucción algamó'l 85 por cientu.