Nesti momentu, a Rato tán investigándolu na Audiencia Nacional pola so xestión al mandu de Bankia ente'l 2010 y el 2012, dende la so salida a bolsa hasta qu'a la entidá financiera rescatóla l'Estáu pol falsiamientu de les sos cuentes. L'Audiencia Nacional tramita dos procesos, el llamáu 'casu Bankia' sobre la salida a bolsa y l'otru sobre l'usu de les tarxetes black opaques al fiscu.

   Ye nel Xulgáu d'Instrucción númberu 31 onde se lleva a cabu la investigación pol patrimoniu de Rato. El xuez titular, Antonio Serrano-Arnal, instrúi una causa principal por blanquéu de capitales de la que se derivaron otres dos pieces, apaeciendo en toes elles el recursu de los paraísos fiscales per parte del que fuera 'númberu dos' del Gobiernu de José María Aznar y director xerente del FMI.

   Esti xuez investiga'l cobru per parte de Rato de polo menos 835.000 euros recibíos per parte de Zenith y Publicis, empreses ambes coles que Bankia roblaría contratos fraudulentos rellacionaos cola campaña de publicidá de la salida a bolsa de la entidá bancaria.

   La otra causa, declarada secreta, ye la que sigue la pista al cobru d'otres comisiones illegales y que llevó al xuez Serrano-Arnal a tomar declaración en calidá d'investigaos a representantes de Telefónica y Lazard, empreses ambes nes que trabayara Rato antes d'acceder a la presidencia de Bankia.

   Según desveló esti domingu 'El Confidencial', l'antiguu vicepresidente del Gobiernu Rodrigo Rato recurrió nel 2013 al bufete panameñu Mossack Fonseca, d'onde proceden los documentos denominaos como los papeles de Panamá, pa liquidar les dos sociedaes opaques onde guardaba 3,6 millones d'euros.

   Esti diariu publicó los documentos que demostraríen que'l bufete xibraltareñu Finsbury Trust & Corporate Services Limited, que xestionaba les sociedaes de Rato nel estranxeru, contrató a Mossack Fonseca pa liquidar Westcastle Corporation y Red Rose Financial Enterprises, dempués de que les vaciaren de dineru.