Rivera espresóse asina, nuna entrevista n'Antena 3 recoyida por Europa Press, na qu'avisó de que "nun tien sen" qu'haya nueves xuntes a trés bandes, dempués de la d'esti xueves, si Podemos aporfiando cola so propuesta.

   El líder de Ciudadanos insistió na so acusación a Podemos d'intentar "dinamitar" la posibilidá d'un acuerdu. A la so manera de ver, la formación morada foi a la xunta d'esti xueves a proponer lo mesmo que propunxo Pablo Iglesias va selmanes en rueda de prensa.

   Por eso, Rivera insistió en pidir al PP "que baxe del monte y "se meta nel fregáu" a negociar con PSOE y Ciudadanos, porque "si Podemos sigue na mesma lóxica y el PP nun baxa a negociar" vamos dir irremediablemente a elecciones. Ye más, ta convencíu de que'l PP va terminar autorizando conversaciones porque ye lo que quieren los sos votantes.

   Eso sí, almitió que tamién sería posible que'l PSOE cambie d'opinión y decida abandonar el so acuerdu con Ciudadanos pa negociar con Podemos y los independentistes. "Si diz lo contrario qu'hasta agora ta nel so derechu, pue facer, nun pasa nada. Si decide que quier pactar con Podemos y los nacionalistes ye una vía, sería un mal Gobiernu pa España pero sería aritméticamente posible", dixo.