Nel casu de los bisnietos de Franco, Juan José Franco Suelves robló'l 1 de xunu del 2012 como director de Malini Investments, una sociedá qu'abrió'l 13 d'ochobre de 1997 y tuvo activa hasta'l 26 de setiembre del 2013, zarrando del too en mayu del 2014. El so hermanu mayor, Francisco de Asís Franco Suelves, robló na mesma fecha como director de Vamfield Alliance Limited. Les dos empreses tán rexistraes nes Isles Virxes Britániques.

   Juan José Franco aseguró a 'El Confidencial' que ye un "inorante absolutu" sobre l'asuntu, pero qu'a lo llargo de la so vida robló "munchos papeles" y "pue ser d'un tema familiar". El so hermanu nun respondió a les llamaes del mediu y el padre de dambos, Francis Franco, afirmó que se trata "d'un tema antiguu" y que "too ta regularizáu y ye perfectamente llegal", anque sin precisar si s'acueye a l'amnistía fiscal del Gobiernu del PP.

   Per otru llau, nos papeles de Panamá figura tamién l'actor Imanol Arias, que dende'l 12 de payares de 1998 tien un poder na sociedá 'offshore' Trekel Trading Limited na isla de Niue (Pacíficu Sur) con un capital social inicial de 50.000 dólares.

   Na mesma fecha autorizóse a Arias pa realizar cualquier operación en nome de la compañía cola cuenta abierta nel bancu suizu Banque Franck. La sociedá quedó inactiva'l 24 de xunetu del 2000, sin que nos documentos conste cuánto dineru pasó per ella.

   El diariu en rede contactó col axente del actor, que se llendó a responder qu'ésti ta "al corriente de les sos obligaciones tributaries".