El xefe de Gobiernu confirmó la so salida nuna xunta con diputaos del so partíu, según reveló a la televisión estatal RUV el ministru d'Agricultura, Sigurour Ingi Johannsson. Sicasí, va siguir al frente del Partíu Progresista.

   Johannsson postulóse públicamente como nuevu primer ministru, magar que la decisión final depende en gran midida de lo que determine'l sociu de l'actual coalición gobernante, el Partíu de la Independencia.

   El líder d'esta formación, Bjarni Benediktsson, sorrayó que va tener que falar con Johannson d'esti nuevu escenariu y plantegó que nun va tomar una decisión hasta pasaos unos díes.

PAPELES

   Gunnlaugsson y la so muyer figuren nos denominaos 'Papeles de Panamá', que recueyen el supuestu tapecimientu d'inversiones millonaries en bancos al traviés de paraísos fiscales. A pesar de que'l llunes refugó dimitir, un día más tarde punxo condiciones a la so continuidá.

   El primer ministru caltuvo contactos col ministru de Finances y líder del Partíu de la Independencia, Bjarni Benediktsson. "Si los diputaos del so partíu nun se ven capaces d'apoyar al Gobiernu, voi disolver el Parlamentu y voi convocar nueves elecciones cuanto antes", escribió Gunnlaugsson na so páxina de Facebook.

   La oposición yá presentó'l llunes una moción de censura contra l'Executivu y miles de manifestantes concentráronse na redoma del Parlamentu como xestu de protesta. Pa esti martes convocóse una nueva concentración contra Gunnlaugsson.