L'octavu terrorista implicáu nos atentaos de París, Salah Abdeslam, que resultó deteníu en Bélxica'l pasáu 18 de marzu, desea collaborar coles autoridaes xudiciales franceses, según declaró esti xueves unu de los sos abogaos, Cédric Moisse, ya informó el diariu 'Le Soir'.
Abdeslam permanez na prisión de Brujas y nun lu treslladaron esta mañana a l'audiencia qu'analiza la execución del mandatu de detención européu. Dicha audiencia retrasóse hasta les 16 hores d'esta tarde, coles mires d'avagar la Fiscalía pa escuchar al deteníu, añadió Moisse.
A pesar de que de primeres Abdeslam opúnxose, el xueves pasáu solicitó a les autoridaes xudiciales belgues que lu estraditaren a Francia "lo más rápido posible", según anunció'l so abogáu Sven Mary en declaraciones a la prensa a la so salida d'una audiencia.
Al presuntu terrorista detuviéronlu'l 18 de marzu nel barriu bruselense de Molenbeek, en Bruxeles, onde se cree que se refuxó mientres cuatro meses dende los atentaos. La investigación rellaciona los atentaos del 13-N colos cometíos nel aeropuertu de Bruxeles y nuna de les estaciones de metru de la ciudá'l pasáu martes.
Igual el presidente francés, François Hollande, como'l so primer ministru, Manuel Valls, espresaren la so esperanza de que les autoridaes xudiciales belgues entainaren la estradición d'Abdeslam.
