Nes entrevistes que concedió en delles canales de televisión, Trump restó importancia al incidente pol que Lewandowski, de 42 años, resultó deteníu'l martes en Florida, acusáu d'agredir a Michelle Fields, reportera del mediu conservador 'Breitbart', a la que garró y fizo un moratón nel brazu nel eventu del pasáu 8 de marzu.

   Trump, amás de defender al so xefe de campaña, acusó a la periodista de garralu y anunció que ta considerando entamar acciones llegales contra ella. "Toi seguru que va haber una contrademanda nel futuru", aseguró n'ABC News. "Ella inventóse esta hestoria", añadió Trump nel NBC y tamién destacó en Fox News que Lewandowski probablemente garrara a la periodista "sin dase cuenta".

   Sicasí, un videu publicáu pola Policía de Florida muestra a Lewandowski garrando a Fields pel brazu y emburriándola hacia atrás, cuando la reportera caminaba hacia l'empresariu. Nun principiu, Trump y Lewandowski negaron los fechos.

    Fields respondió a estes declaraciones en Twitter. "En serio, dexái de mentir", pidió na so cuenta na rede social, dempués de que Trump compartiera una publicación sobre l'arrestu del so compañeru.

   El magnate estaounidense ye'l candidatu favoritu pa la nominación republicana, tres una polémica campaña qu'alertó a munchos de los conservadores del so partíu. Los sos rivales criticaron tanto les sos propuestes n'asuntos tales como la inmigración como l'agresiva retórica qu'emplegó contra los sos oponentes. Pel momentu, Trump encabeza a los sos oponentes, el senador Ted Cruz y el gobernador d'Ohio, John Kasich, na carrera electoral pa consiguir los 1.237 delegaos que precisen los candidatos p'asegurar la so nominación esti branu na convención del Partíu Republicanu.

   Si Trump nun gana la cantidá de delegaos que precisa antes de xunetu, el partíu va tener qu'entamar un complicáu procesu pol que va escoyese al candidatu a la Presidencia.

   Pela so parte, Cruz aseguró en CNN el martes que "por supuesto" despidiera a Lewandowski tres la so detención. Pela so parte, Kasich espresó les sos dudes sobre'l so posible apoyu a la candidatura del próximu nomáu. "Si'l nomáu ye daquién que creo que realmente ta estropiando'l país nun puedo apoyalu", afirmó en CNN.