Los partidarios de que Reinu Uníu siga na Unión Europea caltienen una ventaya d'ocho puntos porcentuales sobre los defensores del 'Brexit', según una encuesta publicada esti martes, a menos de trés meses de que los británicos se pronuncien en referendu.
El sondéu, ellaboráu pola firma Ipsos MORI al traviés de 1.023 entrevistes, cifra nel 49 por cientu el nivel d'apoyu pa la permanencia. El 41 por cientu ye partidariu, sicasí, de que Reinu Uníu ruempa col bloque comunitariu.
Los británicos tán llamaos a votar el próximu 23 de xunu pa decidir si quieren siguir nuna UE reformada o prefieren la rotura. El primer ministru, David Cameron, prometió esta consulta na campaña pa les elecciones parlamentaries del 2015, nes que'l Partíu Conservador llogró una folgada victoria.
Les entrevistes d'Ipsos MORI realizáronse ente'l 19 y el 22 de marzu y, poro, nun tienen en cuenta una posible reacción a los atentaos de Bruxeles, cometíos el día 22.
