Cientos d'inmigrantes que s'alcuentren nel campamentu de refuxaos griegos d'Idomeni, cerca de la frontera con Macedonia, protestaron esti domingu pa reclamar l'abertura de la frontera.
Sobre 50.000 migrantes y refuxaos siguen atrapaos en Grecia dempués d'un zarru de fronteres per parte de los países de la ruta de los Balcanes, que torgó que sigan el so viaxe al traviés d'Europa.
Esti domingu, cerca de 400 concentráronse nel campamentu portando pañuelos blancos y pancartes nes que podía lleese 'Abríi la frontera'. La Policía griega esplegóse na zona pa evitar que s'averaren a la valla.
"Tamos equí güei, y tolos díes, porque nun mos rindimos. Protestamos tolos díes poles muyeres y los neños", dixo Hana, una muyer siria. "Somos humanos y tenemos derechos, y por eso tamos equí y vamos siguir protestando hasta que s'abran les fronteres", añadió.
Grecia indicó que ye una prioridá que los inmigrantes abandonen el campamentu ya intentó convencelos pa que se dirixan a refuxos cercanos, entainando amás la creación de centros de recepción.
La Unión Europea (UE) y Turquía acordaron poner fin al fluxu de refuxaos a Europa a cuenta de concesiones polítiques y financieres a Ankara, nun intentu por zarrar la principal ruta hacia les isles del Exéu.
Foto: ALKIS KONSTANTINIDIS / REUTER
