El Xulgáu de lo Penal númberu 6 de Madrid condergó a a la vocera del Gobiernu municipal, Rita Maestre, a una multa de 12 euros diarios mientres 12 meses --unos 4.380 euros-- por un delitu contra la llibertá de conciencia y los sentimientos relixosos del que la acusaren participar nel asaltu a la capiya del campus de Somosaguas de la Universidá Complutense de Madrid (UCM), informaron a Europa Press fontes xurídiques.
Nel xuiciu, Rita Maestre manifestó que se sumó a la protesta de forma bonal, igual qu'asocedió col so actu de quitar la camiseta pa quedar en suxetador. Asina, repitió que l'espíritu de la protesta yera pacífica y, arriendes d'ello, lexítima.
Con Maestre tamién se sentó nel banquín de los acusaos Héctor Maleiro polos fechos asocedíos en marzu del 2011. Nel momentu de los fechos, Maestre nun yera conceyal nel Conceyu de Madrid.
La Fiscalía solicitaba un añu de prisión pa la vocera del Gobiernu municipal y pa Maleiro. Caltenía que los procesaos entraron sobre les 13.30 hores d'esi día na capiya del campus de Somosaguas y en presencia del capellán y dellos estudiantes que taben orando, invadieron l'espaciu dedicáu al altar.
Los acusaos portaben imaxes del Papa con una cruz esvástica y lleeron distintos pasaxes de la Biblia, según delles cites de Santos y Obispos. Tres ello, Rita Maestre y otres muyeres sin identificar desnudáronse de cintura p'arriba. Darréu, abandonaron la capiya profiriendo delles frases como "Vamos a quemar la Conferencia Episcopal".
