Pa Mariano Rajoy, la decisión de Rita Barberá, de comparecer ante'l xuez de Valencia qu'instrúi'l casu Imelsa de manera voluntaria primero qu'ésti tome una decisión sobre enviar o non el casu al Tribunal Supremu pol delitu de blanquéu, ye un "pasu bien importante".

   Na so comparecencia pública, la que fuera rexidora señaló amás que nun va dimitir y qu'absolutamente naide-y solicitó que dea un pasu p'atrás, de la que reveló que caltuviera una conversación "bien atenta" col xefe del Executivu sobre esti asuntu.

   Rajoy afirmó qu'a él lo que-y paez "más importante" y colo que ta "d'acuerdu dafechu" ye col anunciu que fizo Barberá de que "va  ponese a disposición del xuez". Según resaltó, el PP siempre dixo que van tar "a lo que digan los tribunales". "Creo que ye un pasu alantre bien importante que Rita Barberá atendiera'l pidimientu que-y fizo'l xuez nel día d'ayeri y a mi eso déxame tranquilu", manifestó'l presidente del Gobiernu en funciones, que recordó que son los xueces "los que tienen que decidir".

   En términos paecíos a Mariano Rajoy pronuncióse la vicepresidente del Gobiernu en funciones, Soraya Sáenz de Santamaría, que valoró positivamente que Barberá declare de manera voluntaria ante'l xuez.

   Sicasí, el vicesecretariu de Comunicación del PP, Pablo Casado calificó de "insuficientes" les esplicaciones qu'ofreció la exalcaldesa de Valencia y reconoció que "dalgunos" nel so partíu quedaron "con ganes de más" esplicaciones.

   Esta mesma percepción ye la que tresmitió'l vicesecretariu Sectorial del PP, Javier Maroto, qu'aseguró que nun-y prestaron les declaraciones que fizo güei la senadora popular. Na so opinión, son "insuficientes" y "nun solucionen nada". "A mi nun me prestaron nada. Paécenme insuficientes y creo amás que nun solucionaron nada. Nun pueo ser más claru", recalcó'l dirixente popular.