Fiscalía considera qu'existen nicios racionales de la participación nel blanquéu lo mesmo de Barberá como del diputáu autonómicu Miquel Domínguez, polo que pide que se pase la causa al TS, magar l'instructor caltién que la instrucción tien que considerase "acabada" antes de dar esi pasu.

   Nun autu d'esti llunes, el maxistráu Víctor Gómez ofreció tanto a Barberá como a Miquel Domínguez, aforáu ante'l Tribunal Superior de Xusticia de la Comunidá Valenciana, la posibilidá de comparecer voluntariamente nel xulgáu pa que los escuchen no que cinca colos fechos y la so posible participación nellos "sin sometimientu a interrogatoriu algunu" y manifestar lo que consideren pa la so defensa.

   El xuez entiende que los dos escritos del fiscal nos que pide qu'eleve una esposición razonada a la Sala de lo Penal del TS en relación con dambos aforaos contienen "nicios racionales" que fundamenten xurídicamente'l so pidimientu, pero "magar ello", señala que nun tien un criteriu "tan decidíu tocantes a que, pa elevar la citada esposición, la investigación puea considerase agotada",

   Según se señala nel autu, --contra'l que cabe recursu-- esti trámite "nun ye perentoriu" y "nun ye deseable correr el riesgu de qu'esa apreciación nun la compartieren los altos órganos qu'en definitiva tienen que decidir dicha asunción de competencia", y muéstrase partidariu de que lo faigan con un "claru criteriu" sobre si na investigación "pudo axustase la mayor información útil pa la decisión que-yos pertenez".