Nesti puntu, el ministru, nuna entrevista en Los Almuerzos de TVE recoyida por Europa Press, evitó valorar esa decisión, alegando que nun quería falar de lo que nun sabe. "Yo entiendo que los informes van tar mui fundamentaos y la decisión va ser correcta, y yo soi bien disciplináu, en contra de quien dicen que soi un versu sueltu", resumió.

   Preguntáu pol fechu de qu'esti principiu d'acuerdu cuestionólu la ONU, Margallo afirmó que va ser el serviciu xurídicu européu'l que se pronuncie sobre la so llegalidá. Eso sí, almitió que la xestión de la crisis de los refuxaos "afecta a los principios morales del proyectu européu". Europa, reconoció, "nun ta faciendo lo que pue y non solo poles cifres".

   Según dixo, hasta la fecha España namás acoyó a 18 refuxaos porque'l puntu de partida pa ubicalos ye que reciban "calificación xurídico" nos centros d'acoyida nos países europeos a los que lleguen, Italia y Grecia, y esti mecanismu nun ta funcionando. "Tamos dispuestos a almitir el cupu al que mos comprometimos pero hai que tornar a lo primero", dixo.

   La cifra que más-y llama l'atención, dixo, ye que Líbanu, con una renta per cápita que ye un quintu de la media europea, acueye a una cifra de sirios que supón un 25 per cientu de la so población.