'Chicolate espeso', como esplica la editorial Trabe, recueye minicolumes escrites pa publicar en Les Noticies, selmanariu n'asturianu yá desapaecíu hai un tiempu. Nun tán recoyíes toles que fueron apaeciendo a lo llargo de dellos años en dos etapes distintes: la primera entamó a finales del sieglu XX. Los qu'apaecen equí tán dataes ente los años 2000-2002 y 2010-2012. Al pesar del tiempu pasáu, Trabe afirma que "nun perdieron gota d'actualidá".

   'Resiliencia' axunta dellos artículos d'Ana Vega nos que describe dende distintes perspectives y esperiencies vitales (mesmes y ayenes) la vida como un llargu viaxe, delles veces prestosu y delles tremáu de trabancos.

   Esther Prieto (Arenas de Cabrales, 1960) diose a conocer como poeta nel 1992 con 'Edá de la memoria' y nel 1998 ganó'l Premiu Teodoro Cuesta de Poesía con 'La Mala suerte' (2000). Con 'Güelu Ismail' algamó'l Premiu Xosefa Xovellanos de Novela 2001 y unos años más tarde (2005) publicó 'Gramática d'asturianu. Guía de consulta rápida', resultáu del so llabor profesional de correctora editorial.

   Ana Vega (Oviedo, 1977) tiene publicaes delles obras, ente elles los poemarios 'Breve testimonio de una mirada' (2009), 'La edad de los lagartos' (2011), 'Herrumbre' (2012) y 'Al xeito del tambor' (2013), asina como'l volume de relatos 'Realidad paralela' (2010) y 'El cuaderno griego' (2008), obra miscelánea cola que se dio a conocer. Crítica lliteraria en diarios y revistes especializaes, una parte de los sos escritos (los que faen referencia a obres d'autoría femenina) recuéyense en 'Cantar en el desierto' (2014).

Foto: Biblioasturias.