El secretariu xeneral de la Federación de Construcción y Servicios de Comisiones Obreres, Vicente Sánchez, previó esti xueves que nun plazu de dos selmanes una de les grandes constructores del Ibex 35 va anunciar un ERE que va afectar a más de 700 trabayadores.
Asina lo vaticinó nuna rueda de prensa n'Uviéu, na que nun quiso ofrecer el nome de la firma. Sicasí, sí afirmó que nun se trata de Sacyr, qu'agora poco yá anunció otru ERE qu'afectaba a más de 300 empleos. Les otres cinco son Acciona, ACS, FCC, Ferrovial, OHL.
Según Sánchez, "nos próximos meses habrá un aumentu d'espedientes de regulación d'empléu", y concretó qu'un plazu de dos selmanes va conocese'l casu al que se refirió y que "nos llevaría a cifres de 1.000 trabayadores menos nel sector de la construcción nes grandes empreses", alertó.
Sánchez dedicó la so intervención p'alvertir sobre la situación del sector de la construcción, que nesti momentu tien menos d'un millón de trabayadores y que nel 2007 sumaba más de 2,5 millones de puestos d'empléu. Nel casu d'Asturies, el so homólogu autonómicu nel sindicatu, Jeremías Do Santos, esplicó que nel 2015 la construcción perdió unos 1.700 empleos, hasta quedar nos 7.800 actuales.
